ئۇيغۇر ئېلىدىكى ياۋا تۆگىلەرنىڭ ياشاش مۇھىتى بۇزۇلماقتا


2004.12.13
Share on WhatsApp
Share on WhatsApp

نۆۋەتتە ئۇيغۇر ئېلىدىكى قىممەتلىك ھايۋان- ياۋا تۆگىنىڭ ياشاش مۇھىتى بارغانسېرى بۇزۇلۇپ، سانى مۈشۈك ئېيىقتىنمۇ ئاز بولغان بۇ قىممەتلىك ياۋا ھايۋان نەسلى قۇرۇش خەۋپىگە دۇچ كەلمەكتە.

"تەڭرىتاغ تور بېتى" نىڭ بەرگەن مەلۇماتىغا قارىغاندا، ئۇيغۇر ئېلىدىكى لوپنور ياۋا تۆگە تەبىئىي قوغداش رايونى بۇ مۇناسىۋەت بىلەن ياۋا تۆگىلەرنى سۇ مەنبەلىرى بىلەن تەمىنلەش قۇرۇلۇشىنى باشلىغان.

مەزكۇر خەۋەر تورى ئىلگىرىكى خەۋەرلىرىدە، 78 مىڭ كۋادىرات كىلومېتىر كېلىدىغان لوپنۇر دۆلەتلىك تەبىئىي قوغداش رايونىدا مول كۆمۈر، تۆمۈر ۋە مىس بايلىقلىرى بولغاچقا، شۇ سەۋەبتىن كېلىپ چىققان كان بايلىقلىرىنى قالايمىقان قېزىش ئىشلىرىنىڭ بارغانسېرى كۆپىيىشى، ياۋا تۆگىلەرنىڭ ياشاش مۇھىتىنى بۇزىۋاتقان مۇھىم ئامىل ئىكەنلىكىنى مەلۇم قىلغان ئىدى.

شۇنداقلا لوپنۇر ياۋا تۆگىلەرنى قوغداش رايونىنىڭ باشقۇرۇش مەركىزىنىڭ مەسئۇلى جاڭ يوڭشەن، بۇ يەردىكى كان قېزىش قۇرۇلۇشلىرىنىڭ ياۋا تۆگىلەر ياشايدىغان بىردىن-بىر سۇ مەنبەسىنى كونترول قىلىۋالغانلىغىنى، شۇنداقلا كېرەكسىز ئەخلەتلەرنى بىر تەرەپ قىلىشتىمۇ، مۇھىتنى قوغداش ئۆلچىمىگە رىئايە قىلىنمىغانلىغىنى ئېتىراپ قىلغان ئىدى.

تارىم ئويمانلىغىنىڭ شەرقىي قىرغىقىغا جايلاشقان لوپنۇر رايونىدا ھازىر 500 گە يېقىن قوش لوكىلىق ياۋا تۆگىلەر ياشايدىغان بولۇپ، ئۇنىڭ پۈتۈن دۇنيادىكى سانى 1000 غىمۇ يەتمەيدۇ. شۇنداقلا ئۇ پۈتۈن دۇنيادىكى تۇزلۇق سۇ ۋە شورلۇق ئۆسۈملۈكلەرنى ئىستىمال قىلىپ ياشىيالايدىغان بىردىن-بىر ھايۋان ھېسابلىنىدۇ.(پەرىدە)

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.