Yéngisheher nahiyilik hökümet tor béti siyasiy seweb tüpeyli taqiwitildi

Yéngisheher nahiyisidiki Uyghurlarning charshenbe küni yetküzgen uchurlirigha asasen, mezkür nahiye hökümet tor bétining waqtinche taqiwétilgenliki ashkarilandi.
Muxbirimiz eqide xewiri
2008-08-20
Share

 Bu tor bétining taqiwétilish sewebi, tor bétige sherqiy türkistanning ay yultuzluq kök bayriqi bilen erkinlikke érishish heqqidiki shu'ari chaplan'ghanliqtin bolup, dunya Uyghur qurultiyining bu heqte bergen melumatigha asasen istansimiz muxbiri yéngisheher nahiyilik hökümet tor bétini tekshürüp, tor bétining heqiqeten taqalghanliqini bayqidi.

Dunya Uyghur qurultiyining bayanatchisi dilshat réshit, junggo hökümiti olimpik jeryanida Uyghurlarni nazaret astigha élipla qalmay, belki türlük charilerni ishqa sélip, ularning intérnét tor betliridin paydilinip, oxshimighan pikirlirini bayan qilish erkinlikini cheklewatqanliqini, emma xitay da'irilirining xelqning öz erkinlikige bolghan iradisini hergiz yoq qilalmaydighanliqini tekitlidi.

Dilshat réshitning bildürüshiche, yerlik hökümet, Uyghurlarning intérnéttin paydilinip, xelq'aradiki Uyghur kishilik hoquq teshkilatlirining pa'aliyetliridin xewerdar bolushidin qattiq endishe qilidiken.

Shunga xitay, dunya Uyghur qurultiyi, amérika Uyghur birleshmisi qatarliq teshkilatlar teripidin tesis qilin'ghan tor betliri bilen amérikining erkin asiya radi'osi Uyghur bölümining tor betlirini qattiq qamal qilip tosighandin sirt, mezkür tor betlirini körgüchilerni siyasiy unsurlar qatarida qattiq jazalaydiken.
Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet