Онсу наһийисидики йәр тәврәш зор иқтисади зиян кәлтүрүп чиқарди

Уйғур аптоном райониниң онсу наһийисидә 29 - април күни йүз бәргән 4.9 Бал йәр тәврәш бу районда 3милйон 800 миң йүәнлик иқтисади зиян кәлтүрүп чиқарған. Бу қетимқи йәр тәврәшниң мәркизи ақсу вилайитиниң боздөң йезиси әтрапиға тоғра келиду.

Хитай мәтбуатлириниң хәвәр қилишичә, вәқәдә адәм өлүш яки ярилиниш һадислири көрүлмигән болсиму, лекин келип чиққан иқтисади зиян 3 милйон 800 миң йүәнгә йетидикән.

Уйғур аптоном райони болупму тәңри теғиниң җәнубидики районлар йеқинқи йиллардин бери йәр тәврәш апитиниң еғир иқтисади йүки астида қалмақта. 2004 - Йили маралбеши наһийисиниң чоң қорчақ йезисини мәркәз қилған йәр тәврәш вәқәси , 160 дин артуқ пуқраниң өлүшини кәлтүрүп чиқарған вә чоң қорчақ йезиси пүтүнләй дегүдәк вәйран болған иди.

Өткән йили бай наһийисидә йүз бәргән йәр тәврәш бу районда нурғун қора җайниң өрүлүшини кәлтүрүп чиқарди. Һөкүмәт даирилирини тәнқид қилғучилар бу вәқәләрдә даириләрни сөрәлмилик қилиш, вәқәгә сәл қараш, тәйярлиқсиз туруш вә пуқраларниң һал әһвалиға йәтмәслик билән әйиплимәктә.

Лекин хитай даирилири бу тәнқидләрни рәт қилип кәлди. Уларниң әскәртишичә, чоң қорчақтики йәр тәврәш вәқәсидин кейин һөкүмәт пуқраларни йәр тәврәшкә чидамлиқ өй қурулуш пиланини башлиған. Лекин тәнқидчиләр, бу пилан һал әһвали аранла кетватқан диһқанларға иқтисади йүк болуп қалғанлиқини илгири сүрмәктә. (Әркин)