مىچۈەندە ھۆكۈمەت دېھقانلارنىڭ يەرلىرىنى تۆۋەن باھادا سېتىۋېلىپ شىركەتلەرگە قىممەت باھادا ساتقان

2007-12-11
ئېلخەت
پىكىر
Share
پرىنت

ئۇيغۇر ئېلىنىڭ مىچۈەن شەھىرىدە خىتاينىڭ يەرلىك ھۆكۈمىتى دېھقانلارنىڭ يەرلىرىنى مەجبۇرىي ھالدا زوراۋانلىق ۋاسىتىلىرىنى قوللىنىپ تۆۋەن باھادا سېتىۋېلىپ نەچچە ئون ھەسسە يۇقىرى باھادا يەرگە ئېھتىياجلىق شىركەتلەرگە سېتىپ ئارىلىقتىن نەپ ئالغان، ئەمما يەر ئىگىلىرى دېھقانلار ئۇۋالچىلىققا ئۇچرىغان.

بوشۈن ئاخبارات تورىدا كۆرسىتىلىشىچە، مىچۈەن شەھەرلىك ھۆكۈمىتىنىڭ دېھقانلارنىڭ يەرلىرىنى مەجبۇرىي سېتىۋېلىش قىلمىشى 1993- يىلىدىن 2007- يىلىغا قەدەر داۋاملاشقان بولۇپ، ئۇلار مىچۈەن شەھىرى تەۋەسىدىكى ھەرقايسى يېزىلاردىن زوراۋانلىق ئۇسۇلىنى قوللىنىپ ھەر بىر مو يەرنى 400 يۈەندىن سېتىۋېلىپ 200 مىڭ يۈەندىن شىركەتلەرگە سېتىپ بەرگەن.

دېھقانلار نارازىلىق بىلدۈرۈپ يەر توختىمىغا قول قويۇشنى رەت قىلغاندا، ھۆكۈمەت دائىرىلىرى شەھەر تەۋەسىدىن مىڭدىن ئارتۇق قوراللىق ساقچى قىسىم ئەسكەرلىرىنى تەشكىللەپ دېھقانلارنى قورشاۋغا ئېلىپ قانلىق باستۇرغان. 2002- يىلىدىكى باستۇرۇش جەريانىدا 1 دېھقاننى ئۇرۇپ ئۆلتۈرگەن، 2004- يىلىدىكى باستۇرۇشتا 34 ئادەمنى ئېغىر يارىلاندۇرغان ۋە 38 ئادەمنى قاماققا ئالغان.

بوشۈن تورى ئاشكارىلىغان دېھقانلارنىڭ ئەرز خېتىدىن مەلۇم بولۇشىچە، مىچۈەن شەھىرى تېلېۋىزىيىسى ھەر ئائىلىنىڭ نوپۇس بېشىغا 60 مىڭ يۈەندىن ئارتۇق پۇل بېرىلگەنلىكىنى خەۋەر قىلغان بولسىمۇ، ئەمما بۇ پۇل ئەمەلىيلەشمىگەن.

مەلۇم بولۇشىچە، مىچۈەن شەھىرىدىكى ئۇۋالچىلىققا ئۇچرىغان بۇ بىر بۆلۈك دېھقانلارنىڭ ئەرزىيەت ئىشلىرى ئىزچىل ھالدا قانائەتلىنەرلىك جاۋابقا ئېرىشەلمىگەن بولۇپ، ئاخىرى 11- دېكابىر ئىنتېرنېت ئارقىلىق سىرتقى دۇنيا بىلەن يۈز كۆرۈشتى. (جۈمە)

پىكىرلەر (0)
Share
تولۇق بەت