Michüende hökümet déhqanlarning yerlirini töwen bahada sétiwélip shirketlerge qimmet bahada satqan

Uyghur élining michüen shehiride xitayning yerlik hökümiti déhqanlarning yerlirini mejburiy halda zorawanliq wasitilirini qollinip töwen bahada sétiwélip nechche on hesse yuqiri bahada yerge éhtiyajliq shirketlerge sétip ariliqtin nep alghan, emma yer igiliri déhqanlar uwalchiliqqa uchrighan.

Boshün axbarat torida körsitilishiche, michüen sheherlik hökümitining déhqanlarning yerlirini mejburiy sétiwélish qilmishi 1993- yilidin 2007- yiligha qeder dawamlashqan bolup, ular michüen shehiri tewesidiki herqaysi yézilardin zorawanliq usulini qollinip her bir mo yerni 400 yüendin sétiwélip 200 ming yüendin shirketlerge sétip bergen.

Déhqanlar naraziliq bildürüp yer toxtimigha qol qoyushni ret qilghanda, hökümet da'iriliri sheher tewesidin mingdin artuq qoralliq saqchi qisim eskerlirini teshkillep déhqanlarni qorshawgha élip qanliq basturghan. 2002- Yilidiki basturush jeryanida 1 déhqanni urup öltürgen, 2004- yilidiki basturushta 34 ademni éghir yarilandurghan we 38 ademni qamaqqa alghan.

Boshün tori ashkarilighan déhqanlarning erz xétidin melum bolushiche, michüen shehiri téléwiziyisi her a'ilining nopus béshigha 60 ming yüendin artuq pul bérilgenlikini xewer qilghan bolsimu, emma bu pul emeliyleshmigen.

Melum bolushiche, michüen shehiridiki uwalchiliqqa uchrighan bu bir bölük déhqanlarning erziyet ishliri izchil halda qana'etlinerlik jawabqa érishelmigen bolup, axiri 11- dékabir intérnét arqiliq sirtqi dunya bilen yüz körüshti. (Jüme)