Уйғур елидә өткән бир йилда йәрләрни қанунсиз игиливелиш делосидин 1659 и паш болди

2008-01-08
Елхәт
Пикир
Share
Принт

Уйғур елиниң хәвәр торлирида сәйшәнбә күни хәвәр берилишичә, уйғур диярида қанунсиз йәр игиливелиш вәқәлири көпләп йүз бериватқан болуп, даириләрниң тупрақ қанунини әмәлийләштүрүш җәрянида тәкшүрүп ениқлишичә, өткән бир йилда уйғур ели миқясида йәрләрни қанунсиз игиливелишқа даир 1659 қетимлиқ дело паш болған.

Уйғур елидә қанунға хилап һалда игиливелинған һәм қалаймиқан ечилған йәрләр наһайити кәң даиридә болупла қалмай, қануний рәсмийәтсиз һалда боз йәр ечиш, байлиқ қезиш, йәр байлиқлириға бузғунчилиқ қилиш, исрап қилишқа охшаш қанунсиз һәрикәтләр әвҗ алған болуп, қанунға хилаплиқ қилғучилар тупрақларни, боз йәрләрни игиливелиш, ечиш җәрянида йәнә екологийилик муһитни еғир дәриҗидә бузғунчилиққа учратқан.

Хәвәрдә көрситилишичә, мәлум болған бу йәрләрни қанунсиз игиләш делолирида, болупму қанунсиз һалда кәң көләмдә боз йәр ечиш, өз алдиға йәр содиси қилиш вәқәлири асаслиқ салмақни игиләйдикән.

Уйғур елидики бәзи мәлуматлиқ кишиләрниң инкаслириға қариғанда, хитай һөкүмити пиланлиқ һалда ечиватқан боз йәр һәмдә биңтуән тәрипидин игилинип ечиливатқан йәрләрдин башқа,хитай өлкилиридин келип уйғур елидә қанунсиз боз йәр ачқучилар йеқинқи 10 йилда йәниму көпәйгән болуп, асасий қатламдики бәзи хитай йеза ‏- кәнт кадирлириниңму һоқуқидин пайдилинип қанунсиз һалда йәр содиси қилиш, һәтта йәрлик деһқанларниң йәрлириниму қанунсиз һалда түрлүк васитиләрни қоллинип игиливелишиму наһайити омумйүзлүк әһвал болуп қалған. (Гүлчеһрә)

Пикирләр (0)
Share
Толуқ бәт