Qeshqerde xelq'araliq soda yermenkisi ötküzülmekchi

Tünji qétimliq "qeshqer, jenubiy we ottura asiya soda yermenkisi" seyshenbe küni Uyghur élining kindiki bolghan qeshqer shehiride ötküzülidu.

Buning harpisida qeshqerdiki xitay hökümet da'iriliri axbarat élan qilish yighini ötküzüp, mezkur soda yermenkisige xitayning ichi we sirtidin bolup besh yüzdek karxanining 3000 din artuq wekilliri qatnishidighanliqini bildürdi.

Xitay hökümitige qarashliq tengritagh tor bétining xewirige qarighanda, bu qétimqi soda yermenkisi "jenubiy we ottura asiya bazirini échip, tashqi sodini kéngeytish" dégen témida élip bérilidiken hemde qeshqer arqiliq xitay shirketlirining ottura we jenubiy asiya döletliri soda hemkarliqini kücheytishni meqset qilidiken.

Qeshqer shinyifa xelq'ara körgezme merkizide ötküzülidighan bu yermenkide yéngi téxnika we yéngi mehsulatlar körgezme qilinip, éléktronluq eswablar, déhqanchiliq esliheliri, qurulush matériyalliri , toqulma mallar qatarliq türlük tawarlar yermenke qilinidiken.

Qeshqer, pakistan, hindistan, tajikistan, afghanistan we qirghizistandin ibaret besh dölet bilen chégrilinidighanliqi üchün, muhim istratégiyilik ehmiyetke ige. Xitay hökümiti ilgiri qeshqerni merkez qilghan halda "ottura we jenubiy asiya iqtisadiy chembirikini qurush" teshebbusini otturigha qoyghan idi. Küzetküchiler, xitay hökümitining qeshqerni baza qilish arqiliq, ottura we jenubiy asiyagha tesir da'irisini kéngeytishke uruniwatqanliqini bildürgen.

Nurghun Uyghur pa'aliyetchiliri bolsa, xitay hökümitining bu xil yermenkiler arqiliq Uyghurlar topliship olturaqlashqan rayonlargha téximu köp xitay köchmenlirini yötkishidin endishe qilmaqta. (Arzu)