Русийә приздентиниң сибирийә турушлуқ вәкили уйғур елини зиярәт қилди

Русийә приздентиниң сибирийидә турушлуқ алаһидә вәкили башқилиқидики русийә вәкилләр өмики үрүмчини зиярәт қилип, уйғур аптоном райониниң рәиси исмайил тиливалди, аптоном район парткоминиң секритари ваң лечүәнләр билән көрүшти.

Исмайил тиливалди русийә приздентиниң сибирийидики вәкили билән өткүзгән сөһбитидә , русийә билән хитайниң чечән вә уйғур мустәқилчилиригә қарши елип барған һәмкарлиқиға йүксәк баһа берип, русийә һөкүмитидин терроризм, милли бөлгүнчилик вә диний әсәбиликкә қарши күрәш қилишта хитайни давамлиқ қоллашни тәләп қилған. Хитай һөкүмити 11 - синтәбир вәқәсидин кейин уйғур мустәқиллиқ һәркитини терроризм дәп җакарлиған.

Чечәнләрниң һәркитини терроризм дәп қобул қилип, русийиниң уйғур мәсилисидики қоллишиға еришкәниди. Уйғур аптоном райониниң рәиси исмайил тиливалди, 1996 - йили хотән вәқәсини бастуруш һәрикитигә риясәтчилик қилған. Әйни чағда у аптоном район парткоминиң муавин секритари иди. Униң хотән вәқәсини бир тәрәп қилиш җәрянидики радикал һәрикити, бейҗиң даирилириниң алқишиға еришкән. Сибирийә районидики новосебриск, кемеров вә башқа областлиридин тәркип тапқан росийә федиратсийисиниң сибирийә вәкилләр өмики үрүмчи йәрмәнкисигә тәклип қилинған . Икки тәрәп сибирийә райони билән уйғур или оттурисидики сода - иқтисад, мәдәнийәт, пән- техника һәмкарлиқиға даир бир қатар келишимләрни имзалиди.(Әркин)