Үрүмчи сода йәрмәнкисидә 118 түрлүк сода келишими түзүлди

Уйғур елиниң мәркизидә елип бериливатқан 14 - нөвәтлик "үрүмчи сода йәрмәнкиси" башлинип һазирғичә болған мәзгилдә, үрүмчи иқтисадий сода йәрмәнкә гурупписи хитай вә чәтәл сода ширкәтлири билән җәмий 118 түрлүк келишим түзгән һәмдә тохтам соммиси 28 милярд йүәнгә йәткән.

Тәңритағ хәвәр ториниң мәлуматиға қариғанда, чәтәл мәблиғи асаслиқи, химийә-санаәт, кан байлиқлирини ечиш, йимәкликләрни пишшиқлап ишләш, тоқумичилиқ, өй-җай содиси вә електир қатарлиқ саһәләргә селинған.

Буниңдин сирт йәнә йәрмәнкә җәрянида, 2005 - йиллиқ үрүмчи йәрмәнкиси пакистан-хитай әркин сода келишимидики дәсләпки мәзгиллик үнүм һасил қилиш пилани муһакимә йиғини өткүзүлди. Бу келишим дәсләп хитай вә пакистан даирилири тәрипидин бу йил 4 -айниң 5 -күни имзаланған.

Келишим бойичә, келәр йили 1 - айниң 1 - күнидин башлап, икки тәрәп әркин сода райони рамкиси ичидә, икки тәрәпниң икки хилдики мәһсулатлириға қарита тамужна беҗини толуқ кәчүрүм қилишини йолға қоюш, шуниң билән биргә сода ишлирида һазир йолға қоюливатқан етибар бериш даирисини йәниму кеңәйтип, икки тәрәп карханилирини муддәттин бурун әркин содиниң пайдисидин бәһриман қилиш бәлгиләнгән. (Пәридә)