Xitay hökümiti qedimi yipek yoligha meblegh salmaqchi


2005-03-27
Share

Xitay hökümiti Uyghur élidiki qedimiy yipek yoli medeniy miraslirini qoghdash ishliri üchün, kéyinki besh yil ichide Uyghur éligha 50 milyon dollar meblegh salidighanliqini bildürdi.

Shinxu'a agéntliqining xewirige qarighanda, xitay hökümitining bu yéngi pilanining tepsilatliri téxi muzakire qiliniwatqan iken. Bu programma, xitayda bu yil medeniy miraslarni qoghdash yolida élip bérilidighan eng muhim qurulushlarning biri hésablinidiken.

Qedimiy yipek yoli, esirler ilgiri asiya bilen yawropani tutashturidighan meshhur soda yoli bolup, Uyghur éli bu soda yolidiki muhim bir musape hésablinatti. Fransiye axbarat agéntliqining éytishiche, xitay hökümiti nöwette bu rayondiki sayahetchilikni tereqqi qildurush arqiliq, iqtisadni ilgiri sürüshke intizar bolmaqta.

Buning aldida, b d t, xitay we ottura asiya döletliri bilen birliship, qedimiy yipek yolini janlandurush programmisi élip baridighanliqini bildürgen idi. Xitayning medeniy miraslarni qoghdash pilani b d t ning qollishidiki yipek yolini janlandurush programmisining bir qismi hésablinidu.

B d t ning tereqqiyat - pilan komitétining béyjingdiki wekili xalid malik, yipek yoli üstidiki rayonlarda soda we sayahetchilikni rawajlandurush arqiliq, bu rayonlardiki namratliq weziyitini yaxshilashni ümid qilidighanliqini bildürgen we shundaqla bu pilan boyiche, xitay bilen ottura asiya döletliri arisida "ortaq wiza tüzümi" yolgha qoyush mumkinchilikini otturigha qoyghan idi. (Arzu)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet