Уйғур аптоном райони һайванлардин тарқилидиған юқумлуқ кесәлликләр тоғрисида җиддий уқтуруш тарқатти


2006.03.03
Share on WhatsApp
Share on WhatsApp

Хитай даирилири уйғур аптоном районида һайванлардин тарқилидиған юқумлуқ кесәлликләр тоғрисида җиддий уқтуруш тарқитип, нөвәттә уйғур аптоном райони бойичә һайванлардин тарқилидиған зор көләмдики юқумлуқ кесәлликләрниң партлаш еһтимали йәнила еғир, дәп агаһландурди.

"Шинҗаң гезити" ниң хәвәр қилишичә, бу агаһландурушни уйғур аптоном райониниң муавин рәиси чйән җий өткән айниң ахирлири үрүмчидә чақирилған юқумлуқ кесәлликләр тоғрисидики бир йиғинда оттуриға қойған. Уқтурушта " нөвәттә шинҗаң бойичә зор көләмдики һайванлардин тарқилидиған юқумлуқ кесәлликләр вә уни контрол қилиш хизмити дуч келиватқан вәзийәт йәнила интайин еғир. Бу кесәлликниң баһар пәсилидә йәнә партлаш еһтималлиқини чәткә қаққили болмайду " дәп агаһландурулған. Уйғур аптоном райони хитай бойичә қуш зукам вируси әң көп байқалған район һесаблиниду. Мәзкур районда өткән йили 9 - айдин бу йилниң башлириғичә пичан, даванчиң, күнәс, поскам қатарлиқ 9 җайда қуш зукам вируси байқалған.

Әмма хитай даирилири һазирғичә районда адәмләрниң қуш зукам вирусидин юқумлиниш вәқәси йүз бәрмигәнликини әскәртмәктә. Бейҗиң һөкүмити йәрлик даириләрдин һайванларда байқилидиған еғиз - туяқ яллуғи вә қуш зукам вирусиға қарши мәҗбурий иммунитлаш елип беришни тәләп қилған. Әмма уқтурушта әскәртишичә, аптоном районда һайванларни юқумлуқ кесәлликләргә қарши иммунитлаш хизмити оңушлуқ болмиған. Буниң асаслиқ сәвәби һайванларни иммунитлашқа кетидиған қошумчә ярдәмниң җайиға йетип бармиғанлиқидин икән. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.