Үрүмчидә йеңи типтики зәһәрлик чекимликләр таралмақта

Үрүмчи шәһәрлик җамаәт хәвпсизлик идарисиниң тәкшүрүшигә асасланғанда, үрүмчидә һазир баш чайқиғуч вә муз дориси қатарлиқ йеңи типтики зәһәрлик чекимликәр кәң тарқиливатқан болуп, буларни истимал қилғучиларниң көпүнчиси яш-өсмүрләр икән.

Үрүмчилик шәһәрлик җамаәт хәвпсизлик идариси 26 - ийон "хәлқара зәһәрлик чекимликни чәкләш күни" мунасивити билән бу тәкшүрүшни елип барған болуп, сақчиларниң үрүмчидики һәр қайси дискоханилар вә кечилик көңүл ечиш клублирида елип барған тәкшүрүши нәтиҗисидә, 1 - айдин 3 - айғичә болған арилиқтила тәхминән 7800 данә баш чайқиғучни байқап йиғивалған. Бу қисқиғинә 3 айдики әһвалниң өзила өткән пүтүн бир йилдикидин 2 һәссә еғир болған.

Сақчи орунлириниң билдүрүшичә, буни истимал қилғучиларниң көпүнчиси яш-өсмүрләр һәтта мәктәптә оқуватқан оғул-қизлар икән. Шундақла улар бу хилдики дориларни зәһәрлик чекимлик дәп қаримайдикән. Әмма мутәхәссисләрниң билдүрүшичә, гәрчә бу дориларниң қисқа мәзгилдә хумари тутмиғандәк көрүнсиму, әмма уни көп қетим истимал қилса, адәм униңғиму худдий башқа зәһәрлик чекимликләргә охшаш хумар болуп қалидикән.

Сақчи даирилириниң "тәңритағ хәвәр тори" ға мәлум қилишичә, бу хилдики дориларни истимал қилғандин кейин, кишидә пәйда қилидиған хиялий тәсәввур һәтта бәзидә кишини җинайәт садир қилиш йолиға башлайдикән. (Пәридә)