Ürümchide yéngi tiptiki zeherlik chékimlikler taralmaqta

• 
  2005-06-22

Ürümchi sheherlik jama'et xewpsizlik idarisining tekshürüshige asaslan'ghanda, ürümchide hazir bash chayqighuch we muz dorisi qatarliq yéngi tiptiki zeherlik chékimliker keng tarqiliwatqan bolup, bularni istimal qilghuchilarning köpünchisi yash-ösmürler iken.

Ürümchilik sheherlik jama'et xewpsizlik idarisi 26 - iyon "xelq'ara zeherlik chékimlikni cheklesh küni" munasiwiti bilen bu tekshürüshni élip barghan bolup, saqchilarning ürümchidiki her qaysi diskoxanilar we kéchilik köngül échish klublirida élip barghan tekshürüshi netijiside, 1 - aydin 3 - ayghiche bolghan ariliqtila texminen 7800 dane bash chayqighuchni bayqap yighiwalghan. Bu qisqighine 3 aydiki ehwalning özila ötken pütün bir yildikidin 2 hesse éghir bolghan.

Saqchi orunlirining bildürüshiche, buni istimal qilghuchilarning köpünchisi yash-ösmürler hetta mektepte oquwatqan oghul-qizlar iken. Shundaqla ular bu xildiki dorilarni zeherlik chékimlik dep qarimaydiken. Emma mutexessislerning bildürüshiche, gerche bu dorilarning qisqa mezgilde xumari tutmighandek körünsimu, emma uni köp qétim istimal qilsa, adem uningghimu xuddiy bashqa zeherlik chékimliklerge oxshash xumar bolup qalidiken.

Saqchi da'irilirining "tengritagh xewer tori" gha melum qilishiche, bu xildiki dorilarni istimal qilghandin kéyin, kishide peyda qilidighan xiyaliy tesewwur hetta bezide kishini jinayet sadir qilish yoligha bashlaydiken. (Peride)