Ақтуда қойларниң алтун завутидин чиққан судин зәһәрлинип өлүш вәқәси йүз бәрди

Қизилсу областиниң ақту наһийиси муҗи йезисида йеқинда алтун кандин чиққан керәксиз суни истимал қилғанлиқтин 100 тояқтин артуқ қой зәһәрлинип өлди.

Хитай даирилириниң мәлуматиға қариғанда, бу айниң 8 - күни муҗи йезисидики бир деһқан қойлирини яйлитиватқанда, қойлар муҗийән алтун канидин чиққан сулар қоюп берилгән көлчәктики суни ичип, икки саәттин кийин бир нәччә қой арқа- арқидин өлүп кәткән. 25 - Авғустқичә өлгән қойларниң сани 117 гә йәткән.

Мәзкүр деһқан бу ишни йезилиқ һөкүмәт даирилиригә мәлум қилғандин кийин, муһит идарисиниң техниклири алтун завути керәксиз сулирини қоюп беридиған көлчәктин вә әтрапидики тупрақлардин үлгә елип тәкшүргинидә, буларниң тәркибидә өткүр зәһәрлик химийилик бирикминиң барлиқи байқалған.

Хәвәрдин ашкарилинишичә, мәзкүр муҗийән алтун кени 1994 - йили қурулған вақтидила кан ичишта өткүр зәһәрлик карбонлуқ бирикмини ишләткән. Өткән йили 8 - айда ақту наһийилик кан ечиш ширкити муҗийән көмүр канини өткүзивалғандин кийин, кандики қалдуқ маддиларни бир тәрәп қилишта ишлитилгән тәркибидә зәһәрлик карбонлуқ бирикмә бар сулар керәксиз су көлчикигә қоюп берилгән.

Хитай даирилири хәвәрдә, бу хил зәһәрлик суларниң қоюп берилиши вә тупрақларға сиңишиниң инсанларниң саламәтликигә қанчилик тәсири болидиғанлиқи һәққидә мәлумат бәрмигән. (Арзу)