Tékeste yimekliktin zeherlinish weqesi körülüp 3 ayal qaza qildi

Uyghur élining ili oblasti tékes nahiyiside shenbe küni yimekliktin zeherlinish weqesi yüz bérip, 3 kishi qaza qilghan. Shundaqla hazir 17 kishi doxturxanida qutquziliwatqan bolup, ularning arisida 4 i hazirghiche xeter astida turmaqta. Melum bolushiche, ularning hemmisi ayallar iken.

Tengritagh xewer torining melum qilishiche, deslep xeyrinisa isimlik bir ayal öyide yégen bir waq tamaqtin kéyin zeherlinip, qutquzush ünüm bermey qaza qilghan. Netijide shenbe küni uning nezirige qatnishish üchün bu ayalning öyige kelgen 20 ge yéqin ayal nezirde yigen nersiliridin zeherlinip shu yerdila aghrip qalghan.

Melum bolushiche, nezir bolghan öyning igisi ularni sütlük chay, nan we pishurulghan toxular bilen kütken iken. Méhmanlar bu nersilerni yep uzun ötmeyla, béshi qéyish, köngli élishish, démi siqilish alametliri körülüp, doxturxanigha jiddiy qutquzushqa élip kélin'gen. Bu ayallarning chongi 78 yashta kichiki 27 yashta iken.

Tékes nahiyilik jiddiy késelliklerni kontrol qilish merkizi hazir ular istimal qilghan sütlük chay, tuz, nan we toxular üstidin tekshürüsh élip barmaqta. (Peride)