Хитай таможниси қирғизистандин киргүзүлмәкчи болған икки пай зәмбирәк оқини тепивалди

Уйғур аптоном райониниң еркәштам чегра еғизидики таможна даирилири қирғизистандин еркәштам чегра еғизи арқилиқ уйғур аптоном райониға киргүзүлмәкчи болған икки пай зәмбирәк оқини тепивалған вә һәр икки оқни җамаәт хәвпсизлик даирилириниң бир тәрәп қилишиға тапшуруп бәргән.

Җуңго хәвәр агентлиқиниң ашкарилишичә, еркәштам таможна понкитидики хадимлар 19 - июл күни қирғизистандин киргән импорт малларни тәкшүрүветип, бир төмүр - тәсәк қачиланған машинидин юқириқи 2 зәмберәк оқини байқиған.

Хитай һөкүмити шәрқий түркистан күчлирини террорчи паалийәтләр билән шуғулланмақта, дәп әйибләшкә адәтләнгән болсиму, лекин хитай даирилириниң бу әйиблишини бейҗиңдики чәтәллик дипломатлар бәк ишәнчилик әмәс, дәп қаримақта. Чәтәллик дипломатларниң әскәртишичә, хитай һөкүмити шәрқий түркистан күчлири тәрипидин елип берилди, дәп елан қилған бир қатар зораванлиқ вәқәлири әмәлийәттә шәхси өч елиш һәрикәтлирини асас қилған болуши мумкин. Хитай мәтбуатлири бу қетим юқириқи вәқәни шәрқий түркистан тәшкилатлири билән бағлап чүшәндүрүштин өзини қачурди.

Хәвәрдә машинидики импорт қилинған төмүр - тәсәкләрниң кимгә аит икәнлики тилға елинмиған болсиму, лекин " қирғизистанда бәзи материялларни керәксиз нәрсә сүпитидә импорт қилип пайда тапидиған бәзи қанунсиз содигәрләр, башқа дөләтләргә чиқарса болмайдиған қорал - ярақ қалдуқлирини сетип пайдиға еришмәктә" дәйду.

Җуңго ахбарат агентлиқи тор бетидә юқириқи икки зәмбирәк оқиниң рәсимини елан қилди. Лекин бу оқларниң пүтүнләй кардин чиққан яки ишлитишкә болидиған - болмайдиғанлиқини тилға алмиған. (Әркин)