Xitay tamozhnisi qirghizistandin kirgüzülmekchi bolghan ikki pay zembirek oqini tépiwaldi

• 
  2006-07-21

Uyghur aptonom rayonining érkeshtam chégra éghizidiki tamozhna da'iriliri qirghizistandin érkeshtam chégra éghizi arqiliq Uyghur aptonom rayonigha kirgüzülmekchi bolghan ikki pay zembirek oqini tépiwalghan we her ikki oqni jama'et xewpsizlik da'irilirining bir terep qilishigha tapshurup bergen.

Junggo xewer agéntliqining ashkarilishiche, érkeshtam tamozhna ponkitidiki xadimlar 19 - iyul küni qirghizistandin kirgen import mallarni tekshürüwétip, bir tömür - tesek qachilan'ghan mashinidin yuqiriqi 2 zembérek oqini bayqighan.

Xitay hökümiti sherqiy türkistan küchlirini térrorchi pa'aliyetler bilen shughullanmaqta, dep eyibleshke adetlen'gen bolsimu, lékin xitay da'irilirining bu eyiblishini béyjingdiki chet'ellik diplomatlar bek ishenchilik emes, dep qarimaqta. Chet'ellik diplomatlarning eskertishiche, xitay hökümiti sherqiy türkistan küchliri teripidin élip bérildi, dep élan qilghan bir qatar zorawanliq weqeliri emeliyette shexsi öch élish heriketlirini asas qilghan bolushi mumkin. Xitay metbu'atliri bu qétim yuqiriqi weqeni sherqiy türkistan teshkilatliri bilen baghlap chüshendürüshtin özini qachurdi.

Xewerde mashinidiki import qilin'ghan tömür - teseklerning kimge a'it ikenliki tilgha élinmighan bolsimu, lékin " qirghizistanda bezi matériyallarni kéreksiz nerse süpitide import qilip payda tapidighan bezi qanunsiz sodigerler, bashqa döletlerge chiqarsa bolmaydighan qoral - yaraq qalduqlirini sétip paydigha érishmekte" deydu.

Junggo axbarat agéntliqi tor bétide yuqiriqi ikki zembirek oqining resimini élan qildi. Lékin bu oqlarning pütünley kardin chiqqan yaki ishlitishke bolidighan - bolmaydighanliqini tilgha almighan. (Erkin)