Xitay hökümiti Uyghur aptonom rayoni qurulghanliqining 50 yilliqini "qattiq zerbe bérish herikiti" bilen kütüwalidu

Uyghur aptonom rayonluq jama'et xewpsizlik nazariti 18 - may küni her qaysi wilayet we oblastlardiki jama'et xewpsizlik organlirigha uqturush tarqitip, Uyghur aptonom rayoni qurulghanliqining 50 yilliqini tebrikleshning aldi - keynide aptonom rayon boyiche "her xil jinayi heriketler" ge qarshi tazilash élip bérishni orunlashturghan.

Sherqiy türkistan uchur merkizi, zerbé bérish herikitining asasi nishani atalmish térrorchilar, bölgünchiler we diniy esbiylerge qaritilghanliqini bildürdi. Sherqiy türkistan uchur merkizining ashkarilishiche, jama'et xewpsizlik nazaritining uqturushida mundaq diyilgen: " sherqiy türkistan térrorchiliri, qanunsiz diniy pa'aliyetchiler, idiye sépidiki bölgünchiler, xelq ichidiki zidiyetlerdin paydilinip milliy toqunushqa küshkürtküchilerge zerbe bérip, her qaysi jaylardiki chégra mudapi'e ponkitliri chet'eldiki düshmen küchlerning ichki topilang chiqirishigha qarshi aldini élish tedbirlirini élish kérek."

"Tengritagh tor béti" ning seyshenbe künki xewiride, j x nazaritining aptonom rayon boyiche " oghriliq" , " bulangchiliq" we "basqunchiliq" jinayetlirige qarshi zerbe bérish herikiti qozghaydighanliqini xewer qilghan. Emma "tengritagh tor béti", zerbe bérish herikitining atalmish üch xil küchlerge qaritilghanliqini tilgha almidi, emma heriketning nishani ili, altay we tarbaghatay qatarliq wilayetlerge qaritilidighanliqini ilgiri sürgen.

Xelq'ara jem'iyet xitay hökümitini térorizimgha qarshi turushni bahane qilip, Uyghurlarning kishilik hoquqini depsende qilish bilen eyiplimekte idi. (Erkin)