Оттура вә ғәрбий асиядики уйғур муһаҗирлар өмики үрүмчини зиярәт қилди


2005.07.08
Share on WhatsApp
Share on WhatsApp

Өзини қазақистан, қирғизистан, таҗикистан, түркийә вә сәуди әрәбистанда олтурушлуқ уйғур муһаҗирларниң вәкили, дәп ативалған бир муһаҗирлар өмики үрүмчини зиярәт қилип, уйғур аптоном райони рәиси исмайил тиливалдиниң қобул қилишиға еришти.

Көзәткүчиләрниң билдүрүшичә, аталмиш муһаҗирлар өмикиниң зиярити хитай даирилириниң чәтәлдики шәрқий түркистан күчлирини парчилаш, қолға кәлтүрүшкә болидиған күчләрни өзигә тартиш пиланиниң бир қисимикән.

Муһаҗирлар өмикидики қазақистанлиқ вәкилләргә қурбанов әнвәр йитәкчилик қилған. 6 - Июлдики күтүвелиш мурасимида рәис исмайил тиливалди, "мәркизи һөкүмәт йеқинқи бәш йилда шинҗаңниң асаси әслиһәләр қурулушиға 40 милярд йүән мәбләғ салди, бу йил мәбләғни 14 милярд йүән көпәтйишни пиланлимақта," дәп тәкитлигән.

Әмма хитайниң ғәрбни ечиш истратегийисини тәнқид қилғучилар, хитайниң уйғур аптоном райониға салған мәблиғи уйғурларни мәнпәәтдар қилиш үчүн әмәс, хитай көчмәнлирини орунлаштуруш, дәп тәнқидлимәктә.

Қурбанов әнвәрниң ашкарилишичә, өмәктики көп қисим әзаларниң вәтәнни тунҗи қетим зиярәт қилишикән. Игиллишимизчә, хитай һөкүмити қирғизистанлиқ уйғур иттипақиниң сабиқ рәиси нурмуһәммәд кәнҗи арқилиқ қазақистан уйғур иттипақиниң рәиси қәһриман ғоҗамбәрдини зиярәткә тәклип қилған. Әмма қәһриман ғоҗамбәрди тәклипни рәт қилди. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.