Almas nizamidin türmidiki ayali bilen nazaret astidiki apisi heqqide toxtaldi

Muxbirimiz méhriban
2020-01-20
Share
Almas-Nizamidin-we-ayali-Buzeynep-Abdureshit.png Almas nizamidin we ayali büzeynep abdureshit.
RFA/Mehriban

2020-Yili yéngi yil mezgilide awstraliyedin tughqan yoqlap amérikigha kelgen almas nizamidin 17-yanwar küni radiyomiz ziyaritini qobul qildi. U 2017-yili 3-ayda tutqun qilinip 7 yilliq qamaqqa höküm qilin'ghan türmidiki ayali buzeynep abdurishit bilen 2019-yili 9-ayning 15-küni lagérdin qoyup bérilgenlik xewiri kelgen anisi zulpiye jalalidin toghrisida özi igiligen bir qisim ehwallarni anglatti.

Almas nizamidinning bildürüshiche, u 2019-yili qurban héyt mezgilide anisi zulpiye xanim bilen tunji qétim téléfonda körüshken iken. Shundin u 2019-yili 12-ayning 25-künige qeder birqanche qétim apisi bilen téléfonda sözlishish pursitige érishken.

Emma da'irilerning nazariti astida chet'eldiki baliliri bilen téléfonda sözleshken zulpiye xanim her qétimliq téléfonda sözleshkende balilirini "Qalaymiqan yollarda mangmasliqqa, xitay kompartiyesidin minnetdar bolushqa" ündigen. U téléfonda özining yene dawamliq oquydighanliqini eskertken. Emma salametliki heqqide soralghan so'allargha jawab bérishtin özini qachurghan. Her qétimliq körüshüshte téléfonni amal bar tézrek qoyuwétishke aldirighan. U yene balilirining ékranni échip turup sözlishish teleplirige jawab bermigen. Bu xil alametler uning awstraliyediki oghli almas nizamidin we uning amérikadiki bashqa a'ile ezalirida küchlük endishe peyda qilghan.

Almas nizamidinning bildürüshiche, xitay da'iriliri 2019-yili 11-ayda awstraliye tashqi ishlar ministirliqi arqiliq uning ayali buzeynep heqqidiki so'allirigha jawab qayturghan. Emma uning ayali bilen bilen téléfonda körüshüsh telipi ret qilin'ghan. Shu jümlidin xitay da'irilirining uning apisi zulpiye jalalidinning yéqinqi ehwali heqqide héchqandaq inkas qayturmasliqi uning apisigha bolghan ensirishini barghanche kücheytiwetken.

Almas nizamidin yene bultur 12-ay mezgilide amérikadiki firqet jewdetning ghuljadiki apisi heqqide "Nyo-york waqti géziti" ning muxbiri teripidin ashkarilan'ghan ehwallargha qarap, özide apisining bundin kéyinki aqiwitining qandaq bolushigha qarita küchlük endishe peyda bolghanliqini eskertip ötti.

Xitay da'iriliri 2019-yili 4-ayda uning ayali büzeynep abdurishit heqqide uning atalmish "Topliship jama'et tertipini buzush jinayiti" bilen eyiplinip, 7 yilliq késilgenliki heqqide awstraliye hökümitige jawab bergen iken. Almasning tekitlishiche, bu xitay hökümitining awstraliye terepke uning türmidiki ayali buzeynep heqqide 2-qétim jawab qayturushi hésablinidiken.

Ziyaritimiz axirida almas nizamidin özining bundin kéyinmu her xil qanallar arqiliq türmidiki ayali buzeynep abdurishit we qattiq nazaret ichide turuwatqan apisi zulpiye xanimning ehwalini dawamliq sürüshtüridighanliqini bildürdi.

Almas nizamidin 2009-yildiki "5-Iyul ürümchi weqesi" din kéyin awstraliyege oqushqa chiqqan we kéyinche awstraliye puqraliqigha ötken. Uning ayali buzeynep abdurishit 2017-yili 3-ayda weten ziyariti mezgilide misirda oqughanliqi üchün tutqun qilin'ghan. Buzeynep shu yili 7 yilliq qamaqqa höküm qilin'ghan. Ayali büzeynep abduréshit tutqun qilin'ghan 3 yildin buyan, almas nizamidin xelq'ara kishilik hoquq teshkilatlirigha muraji'et qilish, taratqularda guwahliq bérish, awstraliye hökümiti arqiliq ayali buzeynepning türmidiki weziyitini sürüshtürüsh, 2018-yili yanwarda lagérgha élip kétilgen apisi zulpiye jalalidinnning teqdiri heqqide izdinish qatarliq pa'aliyetlirini dawamlashturup kelmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.