Атушта мисирға бала әвәткән бир җәмәттин аз дегәндә икки кишиниң лагерда җан үзгәнлики вә 5 кишиниң түрмидә икәнлики айдиңлашти

Мухбиримиз шөһрәт һошур
2021-03-04
Share
Атуш бөгәнлик карханичи қурбанҗан абдукеримниң лагердин чиқипла җан өзгәнлики дәлилләнди Атушлуқ карханичи қурбанҗан абдукерим лагердин чиқип 3 күндин кейин җан үзгән.
Zibibulla teminligen

Алдинқи һәптә лагердин чиқипла җан үзгән тиҗарәтчи қурбанҗан абдукерим һәққидә техиму илгириләп елип барған ениқлашлиримиз давамида, униң мисирдин қайтип кәлгән 4 нәпәр җйәниниң түрмидә икәнлики вә иниси сиейитахунниң балилирини мисирда оқутқанлиқи үчүн кесилип нөвәттә җаза муддитини атуштики ағу түрмисидә өтәватқанлиқи дәлилләнди. Йәнә өткән йили лагирда өлгәнлики дәлилләнгән мисирдин қайтқан оқуғучи илһам қариниңму қурбанҗан абдукеримниң җйәнлиридин икәнлики мәлум болди.

Һөрмәтлик радийо аңлиғучилар, өткән һәптә лагерда җан үзгән қурбанҗан абдукеримниң аилә әһвали һәққидә елип берған ениқлашлиримиз давамида, униң тутқун қилинишиға төт җйәниниң мисирда оқуғанлиқиниңму сәвәп болғанлиқи оттуриға чиқти. Мәлум болушичә, қурбанҗан абдукеримниң 3 қериндиши бар болуп, булардин иниси сейитахун, қурбанҗан билән мәслиһәтлишип ибраһим вә әзимәт исимлик икки оғлини2013 ‏-йиллири мисирға оқушқа әвәткән. 2017 ‏-Йилиниң бешида сейитахун атуштики сақчиларниң чақиртиши билән тиҗарәт қиливатқан қирғизистандин қайтип кәлгән. У келишигила мисирдики икки оғлини қайтуруп әкилишкә мәҗбурланған. Униң икки балиси қайтуруп келингәндин кейин, дада-бала һәр үчилиси тәңла қамаққа елинған. Зибибулланиң дейишичә, сейитахун икки балисини мисирда оқутқанлиқи үчүн 18 йиллиқ кесиветилгән. Телефонимизни қобул қилған атуш бөгәндики алақидар хадимлар, сейитахуниң қирғизстанда рәхт тиҗарити қиливатқан йеридин қайтуруп әкилингәнлики вә балилириини мисирда оқутқанлиқи үчүн тутулғанлиқи, шундақла 12 йиллиқ кесилгәнлики вә нөвәттә атуштики ағу түрмисидә җаза муддитини өтәватқанлиқини дәлиллиди.

Зибибулла йәнә сейитахунниң икки оғлидин башқа, бу балилар билән нәврә қериндаш болған мәдинә һекимҗан вә имран һекимҗанларниңму мисирдин қайтқан оқучилар икәнлики вә уларниңму кесиветилгәнликини тилға алди. Бөгәндики алақидар хадимлардин йәнә бири қурбанҗан абдукеримниң җәмитидин болған мәзкур 4 оқуғичиниң түрмидә икәнлики дәлиллиди вә улардин үч нәпириниң 7 вә 9 йиллиқ кесилгәнликини ашкарилиди.

Зибибулланиң дейишичә, лагерда җан үзгән қурбанҗанниң қейинакисиниң оғли илһамҗан муһәммәтму мисирдин мәҗбурий қайтуруп әкелингән вә лагерға әкитилип узун өтмәй җәсити аилисигә қайтурулған. Бу учурниң тоғрилиқи өткән йилқи ениқлашлиримиз давамида дәлилләнгән иди. Зибибулланиң юрттики алақидар қаналлири арқилиқ уқушичә, илһамҗан мәмәтниң өлүм хәвириниң азабиға бәрдашлиқ берәлмигән дадиси мәмәтҗан әқлий тәңпуңлуқини йоқитип қойған.

Һөрмәтлик радийо аңлиғучилар, юқурида атушта мисирға пәрзәнтлирини оқушқа әвәткән бир җәмәттин аз дегәндә икки кишиниң лагирда өлгәнлики вә 5 кишиниң түрмидә икәнлики һәққидә аңлитиш бәрдуқ.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт