Ghuljadiki shinxu'a xelq doxturxanisining bir mezgil lagér ornida ishlitilgenliki ashkarilandi

Muxbirimiz shöhret hoshur
2020.04.28
Ghulja-Sheher-Xinhua-Xelq-Doxturxanisi-lager.jpg Ghulja sheher shinxu'a doxturxanisining terbyelesh merkizi bolushi qeyt qilin'ghan nopus tizimliki.
Oqurmen teminligen

Xitay da'iriliri Uyghur rayonidiki atalmish terbiyilesh merkezlirining jaza lagéri emes, kesip ögitiliwatqan mektepler ikenlikini ilgiri sürüp kelgen bolsimu, emma ta hazirgha qeder bu atalmish mekteplerning omumi sani we éniq orni heqqide melumat bermey kelgen idi. Ghulja shehiri we uning etrapida on nechche orunda lagér qurulghanliqi inkas qilin'ghan bolsimu, bulardin peqet bir qanchisiningla orni aydinglashqan idi. Yéqinqi éniqlashlirimizda ghulja shehiridiki chong doxturxanilardin shinxu'a doxturxanisiningmu bir mezgil lagér ornida ishlitilgenliki aydinglashti.

Ötken hepte ghulja sheher xenbing yézisidiki 15 yilliq késiwétilgen taksi shopuri shir'eli memet'eli heqqide élip barghan éniqlashlirimiz dawamida uning bir nopus tizimliki qolimizgha chüshken we bu tizimlikte shir'elining bir mezgil ghulja sheher shinxu'a doxturxanisi terbiyelesh merkizide turghanliqi qeyt qilin'ghan idi. Shunga biz bu doxturxanigha téléfon qilip, bu heqte éniqlash élip barduq.

“Beydu” uchur ambirida tonushturulushiche, 832 neper ishchi-xizmetchisi bar bolghan bu doxturxana ghulja sheher merkizidiki meshhur jaylardin medris etrapigha jaylashqan. Qurulush kölimi 42066 kwadrat métir (63 mo), yeni kölem jehette ghulja shehiri boyiche aldinqi qatarda sanilidighan bu doxturxana 2017‏-yiligha kelgende lagérgha özgertilgen.

Weziyettin xewerdar kishining bayan qilishiche, eyni chaghda doxturxanidiki bimarlar sheher sirtidiki bir orun'gha yötkilip doxturxana qoru tamlirigha tikenlik simlar orunlashturulghan؛ doxturxana yataq dériziliri tömür qapqaqlar bilen qaplan'ghan. Téléfonimizni qobul qilghan doxturxanidiki alaqidar xadimlar bu doxturxana qorusida nöwette bir “Terbiyelesh merkizi” ning bar yaki yoqluqi heqqidiki so'alimizgha jawab bérishtin özini qachurdi.

Ilgiriki éniqlashlirimiz dawamida ghulja shehiridiki partiye mektep, maliye mektep, yamachang, éléktir istansisi, su derwaza doxturxanisi, yéngi hayat türmisi, bayköl türmisi, boz türme we yéngiyer türmisi qatarliq orunlarning lagér ornida ishlitilgenliki ashkarilan'ghan idi.

Mehkum shir'elining mezkur nopus tizimliki 2018‏-yili 11‏-ayda turghuzulghan we 2018‏-yili 3‏-aylarda shinxu'a doxturxanisi terbiyelesh merkizide ikenliki qeyt qilin'ghan. Téléfonimizni qobul qilghan yene bir xadim bu doxturxanining hazir yaki burun “Terbiyelesh merkizi” ornida ishlitilgen yaki ishlitilmigenlikini sorighinimizda, u özining bundaq bir chong ish heqqide jawab bérelmeydighanliqini bayan qilish arqiliq bu doxturxanining ilgiri lagér ornida ishlitilgenlikini chetke qaqmidi. U bu heqtiki alaqidar so'allirimizgha jawaben bu heqte memuriy bölümdin melumat élishimizni tewsiye qildi.

Weziyettin xewerdar kishi bu doxturxanining kölimining zorluqi we bu ghuljada 2017‏-yili qurulghan lagérlardin peqet biri ikenlikini tilgha élip, ghuljada shu yili lagérda tutulghanlarning sanining pewqul'adde zor ikenlikini eskertidu. U shinxu'a doxturxanisi lagéridiki tutqunlarning kéyinki mezgillerde yéngiyer türmisige yötkep kétilgenlikini ilgiri süridu.

Téléfonimizni qobul qilghan ghulja shehiridiki melum bir doxturxanining bir mes'ul memuri xadimi 2018‏-yili bu doxturxanidiki xadimlarning shinxu'a doxturxanisidiki “Terbiyelesh merkizi” ge nöwet bilen wezipe ewetilgenlikini bayan qilish arqiliq shinxu'a doxturxanisining bir mezgil lagér ornida ishlitilgenlikini delillidi. Uning déyishiche, bu doxturxanining herqaysi bölümidiki xadimlar mezkur “Terbiyelesh merkizi” ge az dégende 15 künde bir qétim wezipe öteshke ewetilgen. Bu xadimning bayanliridin ewetilgen xadimlarning asasliqi lagérdiki tutqunlar arisidiki aghriq-silaqlarni dawalashqa mes'ul bolghanliqi, lagérdiki tutqunlar arisida aghriq-silaqlarning köplüki sewebidin da'irilerning herqaysi doxturxanilardin doxtur yötkeshke mejbur bolghanliqi melum.

“Beydu” diki tonushturushta bu doxturxanining 140 milyon yüenlik muqim mülki barliqi, gérmaniye, shiwitsariye we amérikaning ilghar dawalash üsküniliri barliqi, jümlidin amérikaning “GE Aylanma CT mashinisi” barliqi qeyt qilin'ghan. Emma az dégende 2 yilche jaza lagéri ornida ishlitilgen bu doxturxanining ilgiri yaki nöwette xelq'araliq xeyr-saxawet orunlirining yardimige érishken yaki érishmigenliki melum emes.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.