Toqquzaqning bir kentidin memetyasin urayim qatarliq 57 kishining 10 yilliqtin yuqiri késiwétilgenliki ashkarilandi

Muxbirimiz shöhret hoshur
2020-05-27
Élxet
Pikir
Share
Print
2017‏-Yilining béshida tutulup kétilip, 10 yilliq késiwétilgen memetyasin urayimning qolgha élinishtin ilgiriki we kéyinki süriti.
2017‏-Yilining béshida tutulup kétilip, 10 yilliq késiwétilgen memetyasin urayimning qolgha élinishtin ilgiriki we kéyinki süriti.
Oqurmen teminligen

Türkiyediki toqquzaqliq muhajirlardin biri toqquzaqning oghusaq yéza ghojila kentidiki dosti memetyasin urayimning 2017‏-yilining béshida tutulup ketkenlikidin xewer tapqanliqi, emma aqiwitidin héchqandaq uchur alalmaywatqanliqini melum qilghan idi. Muxbirimizning alaqidar orunlargha qarita élip barghan téléfon ziyaretliri dawamida oghusaqning bir kentidinla memetyasin urayim qatarliq 57 kishining 10 yilliqtin yuqiri késiwétilgenliki ashkarilandi.

Toqquzaqliq muhajirning bayan qilishiche, bu yil 38 yashlargha kirgen memetyasin urayim künboyi étiz-ériq ishliri bilen meshghul bolsimu, dawamliq pakiz kiyinip yürüshi, qolum-qoshna we mehelle-köy bilen munasiwette artuqche gep-söz we talash-tartishlardin uzaq turushi, a'ilisidin bashqa ishlargha bek köngül bölüp ketmesliki qatarliq terepliri bilen mehelle jama'itige tonulghan. Shunga 2017-yilining béshida memetyasin urayim "Terbiyelesh" ke élip kétilgende bu ehwal mehelle jama'itige tasadipiy we heyran qalarliq bir weqe bolup tuyulghan.

Inkas qilinishiche, memetyasin urayim tutulushning aldida déhqanchiliqtin éshin'ghan künliri toqquzaq tewelikidiki zawut yaki mulazimet orunlirida ishlemchilik bilen shughullan'ghan. Shunga biz memetyasin heqqide uchur élish üchün toqquzaqning oghusaq baziridiki bir türküm ish orunlirigha téléfon qilduq. Weziyettin xewerdar kishilerdin biri oghusaqta héchqandaq bir ishqa arilashmighan ehwal astidimu sewebsiz tutup kétilgen we késiwétilgenlerning yalghuz memetyasin urayim emesliki, oghusaqning her bir kentidin yüzlerche kishining késiwétilgenliki yene yüzlerche kishining "Terbiyelesh" te ikenlikini melum qildi. Biz bu uchurning toghra-xataliqini aydinglashturush üchün toqquzaq nahiyelik j. X. Qomandanliq merkizige téléfon qilduq we ulardin oghusaqning ghojila kenti yeni 9‏-kenttinla jem'iy qanche kishi késilip ketkenlikini soriduq. Alaqidar xadim arxiptiki tizimlikke qarap turup mushu bir kenttinla 57 kishining késilip ketkenlikini tilgha aldi. Bu xadimning bayanliridin bu 57 kishining köpinchisining 25-40 yash arisida ikenliki, az bir qismining 40-55 yash arisida ikenliki melum boldi.

Melum bolushiche, bu 57 kishi ichidiki memetyasin urayim qol téléfonida atalmish "Ziyanliq uchur" tarqatqanliqi üchün tutulghan.

Éniqlashlirimiz dawamida memetyasin urayim tewe bolghan 9-kent 1-mehellide bir kochidinla 10 kishining késiwétilgenliki ashkarilandi. Bu mehelle bashliqining ashkarilishiche, memetyasin urayim eng deslepte toqquzaq opaldiki lagérgha ekétilgen. Mehelle kadirliridin birining ashkarilishiche, memetyasin urayim tutup ekétilip bir yildin kéyin a'ilisi bilen ékranda körüshtürülgen. Memetyasin urayimning ékrandiki ajiz qiyapiti uruq-tughqanlirini chöchütken.

Yene ashkarilinishiche, 5‏-kenttin késiwétilgen 57 kishi arisida ayallarmu bar bolup, bularmu peqet qol téléfonida tapshurup alghan yaki yollighan uchurlirida "Mesile" körülgenliki üchün késiwétilgen.

Mezkur 57 mehbusning töwini 10 yilliq, yuqirisi 25 yilliq késiwétilgen. Bularning köpinchisi toqquzaq opaldiki lagérda 1-2 yilche tutup turulghandin kéyin beziliri ürümchidiki, beziliri qeshqerdiki türmilerge yötkelgen. Memetyasin urayim nöwette qeshqerdiki mush türmide jaza mudditini ötimektiken.

Matériyallarda körsitilishiche, oghusaq bazirining 2017-yilidiki omumi nopusi 20500 bolup, 57 ezasi 10 yilliqtin yuqiri késiwétilgen, uning 5‏-kenti 400 che a'ile 2000 che nopustin teshkillen'gen. Emma bu kenttin qanche kishining 10 yilliqtin töwen késilgenliki we qanche kishining téxi lagérda ikenliki hazirche melum emes.

Toluq bet