Инкас: «‹ишәнч тоху дүмлимә ресторани' ниң саһиби ясин мәмәт йетим-йесирларниң бешини силиғанлиқи үчүн тутқунда»

Мухбиримиз шөһрәт һошур
2019-07-19
Елхәт
Пикир
Share
Принт
Уйғур районидики мәлум бир «тәрбийәләш» лагерда тамақ тарқитиштин бурун коммунистик партийәни мәдһийәләп нахша ейтқузулуватқан көрүнүш.
Уйғур районидики мәлум бир «тәрбийәләш» лагерда тамақ тарқитиштин бурун коммунистик партийәни мәдһийәләп нахша ейтқузулуватқан көрүнүш.
Oqurmen Teminligen

Қәшқәр йеңишәһәрлик муһаҗирлардин бири радиомизға инкас қилишичә, йеңишәһәрдики «ишәнч тоху дүмлимә ресторани» ниң саһиби ясин мәмәт ресторанида һәр күни сетилмай қалған таамларни йоқсул аилиләргә ярдәм қилип тарқатқанлиқи вә бу таамға еришкәнләр ичидә сиясий мәһбусларниң пәрзәнтлириму болғанлиқи үчүн қанунсиз ярдәм бериш вә җинайәтчи аилә-тавиабатини қанат астиға елиш билән әйибләнгән. Мухбиримизниң ениқлашлири давамида, мәзкур ресторанниң саһиби ясин мәмәтниң ақсудики бир лагерда икәнлики дәлилләнди.

Қәшқәр йеңишәһәрлик бир муһаҗирниң инкас қилишичә, йеңишәһәрдә 20 йилдин буян ресторан ечиватқан пешқәдәм карханичи ясин мәмәт рестораниниң мулазимәт сүпитини өстүрүш вә өз иҗтимаий мәсулийитини ада қилиш үчүн ресторанида һәр күни бәлгилик бир саәткичә сетилмай қалған таамларни өз тәвәликидики йоқсул аилиләргә вә йетим-йесирларға тарқитип бәргән. Униң бу қилғанлири йиллардин бери сода санаәт башқуруш тармақлири тәрипидин йемәкликниң саплиқини сақлаш вә истемалчиларниң мәнпәәтини қоғдаш дәп мәдһийәлинип вә риғбәтләндүрүлүп кәлгән. ясин мәмәтниң бу қилғанлири 2017 ‏-йилиға кәлгәндә қанунсиз ярдәм бериш билән әйибләнгән болса, һәқсиз таамға еришкән йетим-йесирлар ичидә сиясий мәһбус пәрзәнтлириму болуп қалғанлиқи үчүн у җинайәтчиләр аилә-тавиабатини қанат астиға елиш билән қарилинип қамаққа елинған. 

Бу инкас үстидә елип барған ениқлашлиримиз давамида қәшқәрдә сиясий қанун саһәсидә ишләватқан бир хадим, йеңишәһәрдә «ишәнч тоху дүмлимә ресторани» дәп бир ресторанниң барлиқи, бу ресторанниң 5-6 орунда тармақ дукини барлиқи вә ресторан саһиби ясин мәмәтниң нөвәттә ақсудики бир җаза лагерида икәнликини дәлиллиди. 

Алақидар хадим ясин мәмәтниң тутулуш сәвәби һәққидә мәлумат берәлмиди. 

Илгирики ениқлашлиримиздин мәлум болушичә, йеқинқи йиллардин бери уйғур районида шәхсләрниң өз алдиға хәйр-сахавәт ишлирини елип бериши чәкләнгән; ярдәмниң һөкүмәтниң қоли арқилиқ йәни ислам җәмийити вә яки кәнт партийә ячейкиси арқилиқ қилиниши тәләп қилинған. Әмма җәмийәт хәвәрлиридин мәлум болушичә бу түзүм 2009 ‏-йиллардин кейин оттуриға чиққан. Инкаста дейилишичә, ясин мәмәт йеқинқи йилларда бу түзүмгә бойсунуш үчүн наһийәлик хәлқ ишлири идарисигә илтимас сунған вә һәқсиз таамни бу органниң қоли арқилиқ йәткүзүшни тәләп қилған. Әмма бу орган тамақ тарқитидиғанға мәхсус адәм орунлаштуралмиғачқа, бу ишни ясин мәмәтниң өз алдиға елип беришиға ағзаки рухсәт қилған. Инкаста әскәртилишичә, хәлқ ишлири идариси әмдиликтә бу рухситигә игә чиқмиған яки чиқалмиған. Телефонимизни қобул қилған йеңишәһәр наһийәлик хәлқ ишлири идарисиниң башлиқи бу һәқтики соалимизни қопаллиқ билән рәт қилди. 

Алақидар хадим йәнә ясин мәмәт бешини силиған йетим-йесирлар арисида сиясий мәһбус пәрзәнтлириниң бар-йоқлуқи һәққидики соалимизға җаваб берәлмиди. Әмма у ясин мәмәтниң лагерда сақ-саламәт туруватқанлиқини, тиҗаритини оғлиниң нормал давамлаштуруватқанлиқини баян қилди. 

Һөрмәтлик радио аңлиғучилар, юқирида йеңишәһәрдики «ишәнч тоху дүмлимә ресторани» ниң саһиби, 53 яшлиқ ясин мәмәтниң йетим-йесирларниң бешини силиғанлиқи үчүн лагерға қамалғанлиқи һәққидики бир инкас вә бу инкас үстидә елип барған ениқлашлиримизни диққитиңларға сундуқ.

Пикирләр (0)
Share
Толуқ бәт