Inkas: "'ishench toxu dümlime réstorani' ning sahibi yasin memet yétim-yésirlarning béshini silighanliqi üchün tutqunda"

Muxbirimiz shöhret hoshur
2019-07-19
Élxet
Pikir
Share
Print
Uyghur rayonidiki melum bir "Terbiyelesh" lagérda tamaq tarqitishtin burun kommunistik partiyeni medhiyelep naxsha éytquzuluwatqan körünüsh.
Uyghur rayonidiki melum bir "Terbiyelesh" lagérda tamaq tarqitishtin burun kommunistik partiyeni medhiyelep naxsha éytquzuluwatqan körünüsh.
Oqurmen Teminligen

Qeshqer yéngisheherlik muhajirlardin biri radi'omizgha inkas qilishiche, yéngisheherdiki "Ishench toxu dümlime réstorani" ning sahibi yasin memet réstoranida her küni sétilmay qalghan ta'amlarni yoqsul a'ililerge yardem qilip tarqatqanliqi we bu ta'amgha érishkenler ichide siyasiy mehbuslarning perzentlirimu bolghanliqi üchün qanunsiz yardem bérish we jinayetchi a'ile-tawi'abatini qanat astigha élish bilen eyiblen'gen. Muxbirimizning éniqlashliri dawamida, mezkur réstoranning sahibi yasin memetning aqsudiki bir lagérda ikenliki delillendi.

Qeshqer yéngisheherlik bir muhajirning inkas qilishiche, yéngisheherde 20 yildin buyan réstoran échiwatqan péshqedem karxanichi yasin memet réstoranining mulazimet süpitini östürüsh we öz ijtima'iy mes'uliyitini ada qilish üchün réstoranida her küni belgilik bir sa'etkiche sétilmay qalghan ta'amlarni öz tewelikidiki yoqsul a'ililerge we yétim-yésirlargha tarqitip bergen. Uning bu qilghanliri yillardin béri soda sana'et bashqurush tarmaqliri teripidin yémeklikning sapliqini saqlash we istémalchilarning menpe'etini qoghdash dep medhiyelinip we righbetlendürülüp kelgen. Yasin memetning bu qilghanliri 2017 ‏-yiligha kelgende qanunsiz yardem bérish bilen eyiblen'gen bolsa, heqsiz ta'amgha érishken yétim-yésirlar ichide siyasiy mehbus perzentlirimu bolup qalghanliqi üchün u jinayetchiler a'ile-tawi'abatini qanat astigha élish bilen qarilinip qamaqqa élin'ghan. 

Bu inkas üstide élip barghan éniqlashlirimiz dawamida qeshqerde siyasiy qanun saheside ishlewatqan bir xadim, yéngisheherde "Ishench toxu dümlime réstorani" dep bir réstoranning barliqi, bu réstoranning 5-6 orunda tarmaq dukini barliqi we réstoran sahibi yasin memetning nöwette aqsudiki bir jaza lagérida ikenlikini delillidi. 

Alaqidar xadim yasin memetning tutulush sewebi heqqide melumat bérelmidi. 

Ilgiriki éniqlashlirimizdin melum bolushiche, yéqinqi yillardin béri Uyghur rayonida shexslerning öz aldigha xeyr-saxawet ishlirini élip bérishi cheklen'gen؛ yardemning hökümetning qoli arqiliq yeni islam jem'iyiti we yaki kent partiye yachéykisi arqiliq qilinishi telep qilin'ghan. Emma jem'iyet xewerliridin melum bolushiche bu tüzüm 2009 ‏-yillardin kéyin otturigha chiqqan. Inkasta déyilishiche, yasin memet yéqinqi yillarda bu tüzümge boysunush üchün nahiyelik xelq ishliri idarisige iltimas sun'ghan we heqsiz ta'amni bu organning qoli arqiliq yetküzüshni telep qilghan. Emma bu organ tamaq tarqitidighan'gha mexsus adem orunlashturalmighachqa, bu ishni yasin memetning öz aldigha élip bérishigha aghzaki ruxset qilghan. Inkasta eskertilishiche, xelq ishliri idarisi emdilikte bu ruxsitige ige chiqmighan yaki chiqalmighan. Téléfonimizni qobul qilghan yéngisheher nahiyelik xelq ishliri idarisining bashliqi bu heqtiki so'alimizni qopalliq bilen ret qildi. 

Alaqidar xadim yene yasin memet béshini silighan yétim-yésirlar arisida siyasiy mehbus perzentlirining bar-yoqluqi heqqidiki so'alimizgha jawab bérelmidi. Emma u yasin memetning lagérda saq-salamet turuwatqanliqini, tijaritini oghlining normal dawamlashturuwatqanliqini bayan qildi. 

Hörmetlik radi'o anglighuchilar, yuqirida yéngisheherdiki "Ishench toxu dümlime réstorani" ning sahibi, 53 yashliq yasin memetning yétim-yésirlarning béshini silighanliqi üchün lagérgha qamalghanliqi heqqidiki bir inkas we bu inkas üstide élip barghan éniqlashlirimizni diqqitinglargha sunduq.

Toluq bet