Рәнагүл ғени дадиси түгәп кәткәндә қилған ибадәтлири сәвәблик 17 йиллиқ кесилгән

Мухбиримиз нуриман
2021-08-24
Share
Рәнагүл ғени дадиси түгәп кәткәндә қилған ибадәтлири сәвәблик 17 йиллиқ кесилгән Америкада турушлуқ қәлбинур ғениниң ачиси рәнагүл ғени. 2017-Йили, корла.
Qelbinur Ghéni teminligen

Йеқинқи 4-5 йилдин буян муһаҗирәттики уйғурлар иҗтимаий таратқулар вә ахбарат васитилириниң ярдимидә хитай һакимийити лагер вә түрмиләргә қамиған уруқ-туғқанлирини издәватқанлиқи мәлум. Америкада турушлуқ қәлбинур ғени ашуларниң бири болуп, у аилисиниң бешиға кәлгән паҗиәләрни американиң сабиқ ташқи ишлар министири майк помпейо әпәндигә аңлитиш пурситигә еришкән иди.

Қәлбинур ғени американиң сабиқ ташқи ишлар министири майк помпейо әпәнди билән өткән йили 3-дикабирда көрүшкән. У радийомизниң зияритини қобул қилип, майк помпейо әпәнди билән болған сөһбити вә униңдин кейин учриған тәһдитләр һәққидә тохтилип мундақ деди: "мән помпейо әпәндигә аиләмниң вә пүтүн уйғурларниң дәрдини ейттим. Уйғурларниң бу дунядила дозахниң күнини көрүватқанлиқини, хәлқарадин ярдәм күтүватқанлиқимизни билдүргән идим."

Шуниңдин кейин қәлбинурниң корлада турушлуқ аилиси даим хитай даирилириниң сорақ қилишиға учриған. Хитай даирилири қәлбинурға биваситә яки аилиси арқилиқ бесим қилишқа башлиған. Һәтта қәлбинурға ачиси рәнагүл ғениниң авазлиқ учурини йоллиған болуп, ачиси униңдин "қалаймиқан ишларға арилашмаслиқ" ни тәләп қилған.

Қәлбинурниң билдүрүшичә, ачиси рәнагүл ғени әслидә оқутқучи болуп, икки балиниң аниси икән. У 2018-йили лагерға елип кетилгән болуп, қәлбинурниң йеқинда алған хәвиригә қариғанда у бу йил 5-айда лагердин түрмигә йөткәлгән икән.

Уйғур кишилик һоқуқ қурулуши йеқинда хитай һөкүмитиниң уйғурларниң шәхсий вә аилә турмушиға аит ишләп тарқатқан видейолири һәққидики йеңи доклатини елан қилған иди. 50 Бәтлик бу доклатта, хитайниң уйғурларға аит ишлигән тәшвиқат видейолири арқилиқ уйғурлар дуч кәлгән қисмәтләр вә аиливи паҗиәләрни дәлилләп чиққан. Видейоға чиқирилған уйғурлар хитай тәрипидин бир мәзгил из-дерәксиз йоқ қиливетилгән болуп, кейин хитайниң мәҗбурлиши билән чәт әлдики уруғ-туғқанлири вә барлиқ уйғурларға қарши сөзлитилгән иди.

Қәлбинур ғени хитай һакимийитиниң муһаҗирәттики уйғурларниң аисини гөрүгә еливелиш арқилиқ контрол қилишқа урунуватқанлиқини тәкитлиди. Уму нурғун тәһдитләрни тапшурувалған болуп, хитай даирилириниң өзигә қилған тәһдитлири һәққидә мундақ деди: "улар сән әгәр иҗтимаий таратқулардики паалийәтлириңни тохтатмисаң ачаңни, анаңни бир өмүр көрәлмәйсән, деди. Мән сөзләшни әмди башлидим, мениң техи лагер вә түрмиләргә солақлиқ нәврә туғқанлирим бар. Улар һәр қанчә тәһдит салсиму, мени сөзләштин тохтиталмайду."

Американиң сабиқ ташқи ишлар министири майк помпейо бу йил 19-январ баянат елан қилип, хитайниң уйғурларға қарши "ирқий қирғинчилиқ" вә "инсанийәткә қарши җинайәт" садир қиливатқанлиқини җакарлиған иди. Американиң нөвәттики ташқи ишлар министири антонй блинкенму вәзипигә тәйинлинип тунҗи өткүзүлгән ахбарат елан қилиш йиғинда, хитайниң уйғурлар устидин "ирқий қирғинчилиқ" елип бериватқанлиқини қайта тәкитлиди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт