Қорғастики әсәт абдукерим аилиси чәтәлгә чиққини үчүнла қамақ җазасиға мәһкум қилинған

Мухбиримиз меһрибан
2020-08-27
Елхәт
Пикир
Share
Принт
Түркийәдә оқуватқан дилбәр әсәдниң (оңдин солға) атиси әсәт абдукерим, аниси һәҗәр һәбибулла вә иниси сәйпидин әсәт. 2016-Йили яз, түркийә.
Түркийәдә оқуватқан дилбәр әсәдниң (оңдин солға) атиси әсәт абдукерим, аниси һәҗәр һәбибулла вә иниси сәйпидин әсәт. 2016-Йили яз, түркийә.
Dilber Eset teminligen

Радийомиз игилигән әһваллардин мәлум болушичә, хитай даирилири 2016-йили йил ахири вә 2017-йили йил бешида башлиған уйғурларни түркүм-түркүмләп тутқун қилип, лагерға қамаш долқунида, һәр хил сәвәбләр билән чәтәлләргә чиққан уйғурлар әң дәсләпки тутқун обйектлириға айланған. Кейин улар йәнә даириләр тәрипидин лагер ичидила һөкүм елан қилинип түрмиләргә қамилиштәк еғир җазаға учриған.

Ғулҗа қорғастики әсәт абдукерим вә иниси әнвәр абдукеримләр түркийә вә голландийәдә зиярәттә болғанлиқи үчүнла, 2017-йили йил бешида қорғаста башланған дәсләпки тутқун долқунида лагерға елип кетилгән вә кейин аилиси бойичә қамаққа һөкүм қилиништәк паҗиәлик қисмәткә йолуққан.

Әсәт абдукеримниң түркийәдики қизи дилбәр әсәт аписи һәҗәр һәбибулла, дадиси әсәт абдукерим вә иниси сәйпидин әсәдниң тутқун қилинип лагерға қамилиш вә кейин түрмигә қамилиш сәвәблири һәққидә өзи билидиған әһвалларни аңлатти.

Униң билдүрүшичә, у 2015-йили 3-айда түркийә фатих султан университетида оқуватқан мәзгилидә, икки балисини беқишта қийналғанлиқи үчүн аписи һәҗәр һәбибулла түркийәгә келип, 2016-йили 6-айғичә бир йилдин артуқ нәврилиригә қарап бәргән. Дилбәрниң дадиси әсәт абдукерим вә иниси сәйпидин әсәтләрму түркийәдә қисқа мәзгиллик зиярәттә болған. Әмма һәҗәр һәбибулла нәврилирини бирнәччә ай беқип қайтип кәткәндин кейин, 2017-йили 4-ай мәзгилидә униң қорғастики тәрбийәләш лагериға елип кетилгәнлик хәвири кәлгән.

Әсәт абдукеримниң канададики сиңлиси мәрһаба абдукеримму зияритимизни қобул қилип, бу аилиниң бешиға кәлгән аилә бойичә тутқун қилиниш паҗиәси һәққидә қорғастин игилигән әһвалларни аңлатти.

Уларниң баянлиридин мәлум болушичә, қорғаста деһқанчилиқ билән турмушини қамдаватқан әсәт абдукерим, униң аяли һәҗәр һәбибулла, һүнәрвәнчилик билән шуғуллинидиған оғли сәйпидин әсәт қатарлиқ үчәйлән бу аилиниң түркийәдики қизи дилбәр әсәтни йоқлап түркийәгә кәлгини үчүнла, 2017-йили тутқун қилинип «қайта тәрбийәләш» намида қорғастики лагерға елип кетилгән. 2020-Йили йил бешида уларниң 5 йиллиқ қамаққа һөкүм қилинип әсәт абдукерим вә оғли сәйпидин әсәдниң шихо түрмисигә қамалғанлиқи, аяли һәҗәр һәбибулланиң қорғастики қош ериқ түрмисигә қамалғанлиқ хәвири кәлгән.

Канадада яшаватқан мәрһаба абдукерим ханимниң билдүрүшичә, униң оттуранчи акиси әнвәр абдукерим 2011-йилидин2015-йилғичә голландийәдә оқуватқан қизиниң йенида бир мәзгил туруп қайтип кәткән. Әнвәр абдукерим бу җәрянда қизиниң нормал оқушиға ярдәмдә болғандин башқа голландийәдики уйғур җамаитиниң паалийәтлири вә голландийәдики уйғур тәшкилатлири уюштурған һечқандақ сиясий паалийәтләргә қатнашмиған. Әмма шундақ болушиға қаримай у 2015-йили юрти қорғасқа қайтип кәткәндин кейин, қорғастики сақчи даирилири тәрипидин паспорти тартивелинған вә көп қетим сорақ қилинишқа учриған. 2016-Йили 9-ай мәзгилидә қорғаста башланған уйғурларни тутқун қилип лагерларға қамаш долқунида әнвәр абдукеримму тутқун қилинип, дәсләп қорғастики лагерға қамалған. Кейин униң 10 йиллиқ қамаққа һөкүм қилинип, шихо түрмисигә қамалғанлиқи һәққидә хәвәр кәлгән. Чәтәлгә чиқмиған һәтта паспортиму йоқ аяли гүлнар турсунму тутқун қилинип, лагерға бир мәзгил қамалғандин кейин, 4 йиллиқ кесилип қорғас қошериқ түрмисигә қамалған.

Юқириқи аваз улинишидин сөһбәтниң тәпсилатини аңлайсиләр.

Пикирләр (0)
Share
Толуқ бәт