Qorghastiki eset abdukérim a'ilisi chet'elge chiqqini üchünla qamaq jazasigha mehkum qilin'ghan

Muxbirimiz méhriban
2020-08-27
Élxet
Pikir
Share
Print
Türkiyede oquwatqan dilber esedning (ongdin solgha) atisi eset abdukérim, anisi hejer hebibulla we inisi seypidin eset. 2016-Yili yaz, türkiye.
Türkiyede oquwatqan dilber esedning (ongdin solgha) atisi eset abdukérim, anisi hejer hebibulla we inisi seypidin eset. 2016-Yili yaz, türkiye.
Dilber Eset teminligen

Radiyomiz igiligen ehwallardin melum bolushiche, xitay da'iriliri 2016-yili yil axiri we 2017-yili yil béshida bashlighan Uyghurlarni türküm-türkümlep tutqun qilip, lagérgha qamash dolqunida, her xil sewebler bilen chet'ellerge chiqqan Uyghurlar eng deslepki tutqun obyéktlirigha aylan'ghan. Kéyin ular yene da'iriler teripidin lagér ichidila höküm élan qilinip türmilerge qamilishtek éghir jazagha uchrighan.

Ghulja qorghastiki eset abdukérim we inisi enwer abdukérimler türkiye we gollandiyede ziyarette bolghanliqi üchünla, 2017-yili yil béshida qorghasta bashlan'ghan deslepki tutqun dolqunida lagérgha élip kétilgen we kéyin a'ilisi boyiche qamaqqa höküm qilinishtek paji'elik qismetke yoluqqan.

Eset abdukérimning türkiyediki qizi dilber eset apisi hejer hebibulla, dadisi eset abdukérim we inisi seypidin esedning tutqun qilinip lagérgha qamilish we kéyin türmige qamilish sewebliri heqqide özi bilidighan ehwallarni anglatti.

Uning bildürüshiche, u 2015-yili 3-ayda türkiye fatix sultan uniwérsitétida oquwatqan mezgilide, ikki balisini béqishta qiynalghanliqi üchün apisi hejer hebibulla türkiyege kélip, 2016-yili 6-ayghiche bir yildin artuq newrilirige qarap bergen. Dilberning dadisi eset abdukérim we inisi seypidin esetlermu türkiyede qisqa mezgillik ziyarette bolghan. Emma hejer hebibulla newrilirini birnechche ay béqip qaytip ketkendin kéyin, 2017-yili 4-ay mezgilide uning qorghastiki terbiyelesh lagérigha élip kétilgenlik xewiri kelgen.

Eset abdukérimning kanadadiki singlisi merhaba abdukérimmu ziyaritimizni qobul qilip, bu a'ilining béshigha kelgen a'ile boyiche tutqun qilinish paji'esi heqqide qorghastin igiligen ehwallarni anglatti.

Ularning bayanliridin melum bolushiche, qorghasta déhqanchiliq bilen turmushini qamdawatqan eset abdukérim, uning ayali hejer hebibulla, hünerwenchilik bilen shughullinidighan oghli seypidin eset qatarliq ücheylen bu a'ilining türkiyediki qizi dilber esetni yoqlap türkiyege kelgini üchünla, 2017-yili tutqun qilinip "Qayta terbiyelesh" namida qorghastiki lagérgha élip kétilgen. 2020-Yili yil béshida ularning 5 yilliq qamaqqa höküm qilinip eset abdukérim we oghli seypidin esedning shixo türmisige qamalghanliqi, ayali hejer hebibullaning qorghastiki qosh ériq türmisige qamalghanliq xewiri kelgen.

Kanadada yashawatqan merhaba abdukérim xanimning bildürüshiche, uning otturanchi akisi enwer abdukérim 2011-yilidin2015-yilghiche gollandiyede oquwatqan qizining yénida bir mezgil turup qaytip ketken. Enwer abdukérim bu jeryanda qizining normal oqushigha yardemde bolghandin bashqa gollandiyediki Uyghur jama'itining pa'aliyetliri we gollandiyediki Uyghur teshkilatliri uyushturghan héchqandaq siyasiy pa'aliyetlerge qatnashmighan. Emma shundaq bolushigha qarimay u 2015-yili yurti qorghasqa qaytip ketkendin kéyin, qorghastiki saqchi da'iriliri teripidin pasporti tartiwélin'ghan we köp qétim soraq qilinishqa uchrighan. 2016-Yili 9-ay mezgilide qorghasta bashlan'ghan Uyghurlarni tutqun qilip lagérlargha qamash dolqunida enwer abdukérimmu tutqun qilinip, deslep qorghastiki lagérgha qamalghan. Kéyin uning 10 yilliq qamaqqa höküm qilinip, shixo türmisige qamalghanliqi heqqide xewer kelgen. Chet'elge chiqmighan hetta pasportimu yoq ayali gülnar tursunmu tutqun qilinip, lagérgha bir mezgil qamalghandin kéyin, 4 yilliq késilip qorghas qoshériq türmisige qamalghan.

Yuqiriqi awaz ulinishidin söhbetning tepsilatini anglaysiler.

Toluq bet