Аилиси лагерларға тутулған уйғур яшлириниң түркийәдики паалийәтлири давамлашмақта

Ихтиярий мухбиримиз азиғ
2020-09-28
Share
lager-tawabiat-turkiye-3.jpg Йиғивелиш лагерлири қурбанлириниң истанбулдики уруқ-туғқанлири түрк хәлқигә уйғурлар дуч келиватқан системилиқ етник қирғинчилиқни аңлитишқа тиришмақта. 2020-Йили 26-сентәбир, түркийә.
RFA/Azigh

26-Сентәбир күни уйғур дияридики йиғивелиш лагерлири қурбанлириниң истанбулдики уруқ-туғқанлиридин онға йеқин киши кеннидий юқири сүрәтлик таш йолида «хитай аиләм қәйәрдә?», «җаза лагерлири тақалсун!», «3~5 милйонғичә инсан хитайниң җаза лагерлирида» қатарлиқ пилакатларни тутуп туруш арқилиқ түрк хәлқигә уйғурлар дуч келиватқан системилиқ етник қирғинчилиқни аңлитишқа тиришти.

Паалийәтни йиғивелиш лагерлириға соланған аилә йеқинлириниң давасини қилиш җәрянида таксим мәйданида сақчиларниң паракәндичиликигә учриған вә аманлиқ күчлири тәрипидин әнқәрәгә киргүзүлмигән уйғур яшлири тәшкиллигән болуп, паалийәт йолдин өткән кишиләр вә машинидики йолучиларниң қаттиқ диққитини қозғиған. Кишиләр түрлүк ишарәтләр билән паалийәткә қатнашқучиларни қоллайдиғанлиқини билдүргән.

Нәқ мәйданда йолдин өтүп кетиватқан гамзә ханим зияритимизни қобул қилип мундақ деди: «хитайниң уйғур түрклиригә қаратқан етник қирғинчилиқ сияситини қаттиқ әйибләймән. Дөлитимиздә бәзи сәвәбләр түпәйлидин уйғур түрклири учраватқан зулум анчә күнтәртипкә кәлмәйватиду. Мән һәр қайси сиясий партийә рәһбәрлири вә кишилик һоқуқ тәшкилатлиридин уйғур мәсилисигә җиддий көңүл бөлүшини үмид қилимән.»

Бу һәқтә зияритимизни қобул қилған йиғивелиш лагерлири қурбанлириниң аилә йеқинлиридин мәдинә назими мәзкур паалийәт һәққидә тохтилип, мундақ деди: «биз йиғивелиш лагеридики қериндашлиримизниң авазини аңлитиш мәқситидә, өзимизниң уруқ-туғқанлириниң сүрәтлири чүшүрүлгән майкиларни кийип, қолимизда пилакатларни тутуп истанбул зәйтунбурниниң әң қатнаш қистаңчилиқи болидиған чоң йолиға чиқип паалийәт илип бардуқ. Пилакатларға язған хәтлиримизни көргән түркләр машинилириниң сигналлирини бесиш яки келип биз билән биллә икәнликини билдүрүш арқилиқ өзлириниң уйғурларға қилиниватқан зулумни билидиғанлиқини, уйғурлар учраватқан зулумни әйибләйдиғанлиқини ипадилиди. Паалийитимиз интайин үнүмлүк болди. Паалийәт җәрянида бир адәм маңа һәрбийчә салам берип өткән иди, интайин һаяҗанландим. Көңлүм бузулуп көзүмгә яш кәлди. Паалийәтлиримиз буниңдин кейинму давамлишиду. Мәқситимиз зулум астида езиливатқан қериндашлиримизниң авазини аңлитиш, бу йолдин һәргиз тохтап қалмаймиз.»

Көзәткүчләрниң қаришичә уйғур паалийәтчилириниң сиясий һәрикәт даириси түркийәдә барғансери тарийиватқан болуп, бу әһвал түркийәниң хитай билән болған мунасивәтлириниң күнсери йеқинлишиватқанлиқи билән мунасивәтлик икән. Таксим мәйданида майкилири тәтүр кийдүрүлгән вә әнқәрә сәпиридә сақчилар тәрипидин тосқунлуққа учриған йиғивелиш лагерлири қурбанлириниң аилә йеқинлири җасаритиниң суслашмиғанлиқини, паалийәтлирини давамлаштуридиғанлиқини билдүрди. Хитай һөкүмити тәрипидин аилилири парчиланған паалийәтчиләр түрлүк тосқунлуқларға учраватқан болсиму, әмма һәр хил өзгичә паалийәтләрни тәшкилләп, аилилири қутулдуруш йолида тохтап қалмайдиғанлиқини тәкитләп кәлмәктә.

Йиғивелиш лагерлири қурбанлириниң аилә йеқинлиридин алимҗан турди истанбулда илип бериливатқан лагер қурбанлири йеқинлириниң паалийәтлири һәққидә тәпсилий тохталди.

Гәрчә хитай һөкүмити уйғурларниң кишилик һоқуқ әһвалиниң яхши икәнликини, йиғивелиш лагерлириниң тақалғанлиқини тәкитләп келиватқан болсиму, йиғивелиш лагерлири қурбанлириниң аилә йеқинлири аилилири билән алақилишалмайватқанлиқини, лагерлардики аилә йеқинлириниң шәртсиз қоюп берилиши керәкликини ейтип кәлмәктә.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.