Учтурпанда сабиқ валибол команда һуҗумчиси абләт бавудун лагерда йетип һасатаяқлиқ болуп чиққан

Мухбиримиз шөһрәт һошур
2020-10-05
Share
lager-yengisar-qeshqer.jpg Сим тикән билән чөридәлгән лагер дәрвазисидики хитай дөләт байриқи. 2019-Йили 4-июн, йеңисар.
AFP

Учтурпан оттура мәктипиниң сабиқ валибол команда һуҗумчиси абләт бавудун, 2017-йили йил бешида лагерға әкетилип, икки йилдин кейин бөрикидин чатақ чиққан вә бәдәнлири ишшишқа башлиған. Униң саламәтлик әһвали күндин-күнгә яманлишип лагериниң мәшғулатлириға маслишалмиғандин кейин кепилликкә қоюп берилгән. Техи үч йилниң алдида бир метир 90 санта егизликтики бойи, келишкән тәқи-турқи вә валибол мәйданидики чәбдәс һәрикәтлири билән тамашибинларниң һәвисини қозғап кәлгән абләт бавудун, нөвәттә икки қолтуқи һасатаяқтики аҗизанә һалити билән уруқ-туғқан вә мәһәллә койлириниң йүрикини әзмәктә.

Муһаҗирәттики учтурпанлиқлардин бири бир шәхсий сөһбитимиз давамида, учтурпан имамлиримдики бир валиболчи яшниң лагерда икки йил йетип һасатаяқлиқ болуп чиққанлиқини тилға алғаниди. Бу йип учиға асасән елип барған ениқлашлиримиз давамида телефонимизни қобул қилған, учтурпан имамлиримдики бир кәнт аманлиқ мудириниң баян қилишичә, учтурпандики сабиқ валибол команда һуҗумчиси абләт бавудун, 2017 ‏-йили лагерға тутуп кетилип, 2019-йилиниң ахири кепилликкә қоюп берилгән. Лагерға валибол мәйданида топ уруватқан мәзгилидә тутуп әкетилгән абләт бавудун, кепилликкә қоюп берилгәндә икки қолтуқи һасатаяқлиқ һаләттә сақчиларниң назаритидә өйигә киргән. Дейилишичә, бөрики зәхимләнгән абләт бавудун бир йилға йеқин вақиттин буян униң йүз-көзидики ишшиқ техи янмиған, ишшиқ бәзидә пүтүн бәдинигә тарқалған.

Мәлум болушичә, лагер уни валибол мәйданлиридин әбәдий видалаштурған; тирикчиликиниң мәнбәси болған кәнт боғалтирлиқидинму айрип ташлиған.

Мәлум болушичә, абләт бавудунниң һаятидики оңушсизлиқ, 2008-йили алий мәктәп имтиһанида бир номури кәмләп қелиш билән башланған. Аилисиниң иқтисадий қийинчилиқи сәвәблик қайта оқуш вә имтиһанға қатнишишиға имкан болмиған. У пәқәт оттура мәктәп валибол командисидики мәзгилидә етирапқа еришкән топ маһаритини җари қилдуруш йәни учтурпандики иштин сиртқи валибол командилириға актип қатнишиш арқилиқ, мәниви дунясидики бир бошлуқни толдурушқа тиришқан. Бәдән сапаси вә келишкән тәқи-турқи билән кишиләрниң һәвисини қозғап келиватқан абләт бавудун тәңри ата қилған бу байлиқидинму мәһрум қелишини хиялиға кәлтүрмигән.

Мәзкур аманлиқ мудири, абләт бавудунға кәнт вә йеза кадирлири, хизмәт гурупплириниң яхши қараватқанлиқини илгири сүриду. Әмма мәвҗут реаллиқтин мәлумки бу "хәйр-хаһлиқ", униң лагер сәвәблик йоқатқанлириниң һечбирини әслигә кәлтүрүшкә қадир әмәс. Абләт бавудун болса, бу хәйхаһлиққа әһмәт ейтишқа һоқуқлуқ; әмма, йоқатқанлири үстидин шикайәт қилишқа, һәтта лагерда немиләрни көргәнликини баян қилишқа һоқуқлуқ әмәс. Чүнки у баштинла ениқ болмиған җаза муддитини техи түгәткини йоқ, у йәнила кепиллик астида. Абләт бавудунниң ихтиярсиз һалда төкүлүп туридиған көз яшлири, өз қисмитигә қарита исянниң инкасиму яки еғиздин чиқиралмайватқан дәрт-әләмлириниң партлап чиқишиму вә бөрәк зәиплишишиниң тәбиий кесәллик аламитиму бу һазирчә мәлум әмәс.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт