Uchturpanda sabiq walibol komanda hujumchisi ablet bawudun lagérda yétip hasatayaqliq bolup chiqqan

Muxbirimiz shöhret hoshur
2020-10-05
Share
lager-yengisar-qeshqer.jpg Sim tiken bilen chöridelgen lagér derwazisidiki xitay dölet bayriqi. 2019-Yili 4-iyun, yéngisar.
AFP

Uchturpan ottura mektipining sabiq walibol komanda hujumchisi ablet bawudun, 2017-yili yil béshida lagérgha ekétilip, ikki yildin kéyin börikidin chataq chiqqan we bedenliri ishshishqa bashlighan. Uning salametlik ehwali kündin-kün'ge yamanliship lagérining meshghulatlirigha maslishalmighandin kéyin képillikke qoyup bérilgen. Téxi üch yilning aldida bir métir 90 santa égizliktiki boyi, kélishken teqi-turqi we walibol meydanidiki chebdes heriketliri bilen tamashibinlarning hewisini qozghap kelgen ablet bawudun, nöwette ikki qoltuqi hasatayaqtiki ajizane haliti bilen uruq-tughqan we mehelle koylirining yürikini ezmekte.

Muhajirettiki uchturpanliqlardin biri bir shexsiy söhbitimiz dawamida, uchturpan imamlirimdiki bir walibolchi yashning lagérda ikki yil yétip hasatayaqliq bolup chiqqanliqini tilgha alghanidi. Bu yip uchigha asasen élip barghan éniqlashlirimiz dawamida téléfonimizni qobul qilghan, uchturpan imamlirimdiki bir kent amanliq mudirining bayan qilishiche, uchturpandiki sabiq walibol komanda hujumchisi ablet bawudun, 2017 ‏-yili lagérgha tutup kétilip, 2019-yilining axiri képillikke qoyup bérilgen. Lagérgha walibol meydanida top uruwatqan mezgilide tutup ekétilgen ablet bawudun, képillikke qoyup bérilgende ikki qoltuqi hasatayaqliq halette saqchilarning nazaritide öyige kirgen. Déyilishiche, böriki zeximlen'gen ablet bawudun bir yilgha yéqin waqittin buyan uning yüz-közidiki ishshiq téxi yanmighan, ishshiq bezide pütün bedinige tarqalghan.

Melum bolushiche, lagér uni walibol meydanliridin ebediy widalashturghan؛ tirikchilikining menbesi bolghan kent boghaltirliqidinmu ayrip tashlighan.

Melum bolushiche, ablet bawudunning hayatidiki ongushsizliq, 2008-yili aliy mektep imtihanida bir nomuri kemlep qélish bilen bashlan'ghan. A'ilisining iqtisadiy qiyinchiliqi seweblik qayta oqush we imtihan'gha qatnishishigha imkan bolmighan. U peqet ottura mektep walibol komandisidiki mezgilide étirapqa érishken top maharitini jari qildurush yeni uchturpandiki ishtin sirtqi walibol komandilirigha aktip qatnishish arqiliq, meniwi dunyasidiki bir boshluqni toldurushqa tirishqan. Beden sapasi we kélishken teqi-turqi bilen kishilerning hewisini qozghap kéliwatqan ablet bawudun tengri ata qilghan bu bayliqidinmu mehrum qélishini xiyaligha keltürmigen.

Mezkur amanliq mudiri, ablet bawudun'gha kent we yéza kadirliri, xizmet gurupplirining yaxshi qarawatqanliqini ilgiri süridu. Emma mewjut ré'alliqtin melumki bu "Xeyr-xahliq", uning lagér seweblik yoqatqanlirining héchbirini eslige keltürüshke qadir emes. Ablet bawudun bolsa, bu xeyxahliqqa ehmet éytishqa hoquqluq؛ emma, yoqatqanliri üstidin shikayet qilishqa, hetta lagérda némilerni körgenlikini bayan qilishqa hoquqluq emes. Chünki u bashtinla éniq bolmighan jaza mudditini téxi tügetkini yoq, u yenila képillik astida. Ablet bawudunning ixtiyarsiz halda tökülüp turidighan köz yashliri, öz qismitige qarita isyanning inkasimu yaki éghizdin chiqiralmaywatqan dert-elemlirining partlap chiqishimu we börek ze'iplishishining tebi'iy késellik alamitimu bu hazirche melum emes.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.