Санҗи областлиқ 3-оттура мәктәпниң муавин мудири әкрәм ислам тутқунда

Мухбиримиз меһрибан
2020-10-22
Share
muawin-mektep-mudiri-Ekrem-Islam.jpg Санҗи областлиқ 3-оттура мәктәпниң муавин мудири әкрәм ислам мукапатлаш мурасимида. (Вақти вә орни ениқ әмәс)
Rizwan’gül teminligen

Йеқинда радийо аңлиғучилиримиздин ризвангүл ханим радийомизға учур йоллап, санҗидики бирдин бир уйғур-қазақ оттура мәктипи болған областлиқ 3-оттура мәктәпниң уйғур миллитидин болған муавин мудири әкрәм ислам, мәктәп мудири исһақ муәллим вә бирқанчә оқутқучиниң 2018-йили қишлиқ тәтилдин кейин тутқун қилинип лагерға елип кетилгәнликини билдүргәниди.

21-Өктәбир күни американиң виргинийә иштатидики ризвангүл ханим, радийомиз уйғур бөлүми зияритини қобул қилип, мәзкур мәктәптин тутқун қилинған мәктәпниң муавин мудири әкрәм исламниң өзиниң қейин акиси икәнликини билдүрүп, 2018-йили 2-айниң 5-күни санҗидики өйидин тутуп кетилгәнликидин йеқинда хәвәр тапқанлиқини билдүрди.

Ризвангүл ханим йәнә мәзкур мәктәпниң баш мудири исһақ муәллим вә униң мәзкур мәктәптики аяли шаадәт муәллим, рәйһан муәллим қатарлиқларниңму 2018-йили қишлиқ тәтилдин кейин тутқун қилинғанлиқи һәққидә учур алғанлиқини билдүрди.

Ризвангүл ханимниң билдүрүшичә, мәктәпниң муавин мудири әкрәм ислам, 1971-йили 7-айниң 17-күни туғулған. У 1989-йилғичә санҗи областлиқ 3-оттура мәктәптә оқуғандин кейин, шинҗаң университетиға қобул қилинған. 1994-Йили шинҗаң университетиниң җуғрапийә факултетини пүттүрүп, ана мәктипи санҗи областлиқ 3-оттура мәктәпкә җуғрапийә оқутқучиси болуп тәқсим қилинған. Шундин буян әкрәм ислам өзиниң тиришчанлиқи билән көзгә көрүнүп көп қетим илғар оқутқучи болуп тәқдирләнгән. 2013-Йили мәзкур мәктәп санҗидики хитай тиллиқ мәктәпләр билән бирләштүрүлгән. Бу мәзгилдә у областлиқ маарип идарисиниң орунлаштурушида санҗидики гуңхуа оттура мәктипигә юқири мааш билән оқутқучилиқ қилған. Әкрәм ислам 2015-йили санҗи областлиқ маарип идарисиниң орунлаштуруши билән санҗи областлиқ 3-оттура мәктәпкә муавин мәктәп мудири қилип тәйинләнгәникән.

Биз санҗи областлиқ 3-оттура мәктәптин тутқун қилинған мәктәп мудири исһақ вә мәктәпниң муавин мудири әкрәм ислам һәққидә илгириләп әһвал игиләш үчүн, гогул торидин издәш арқилиқ санҗи областлиқ 3-оттура мәктәпкә, санҗи шәһәрлик маарип идариси вә санҗи областлиқ маарип идариси қатарлиқ җайларға телефон қилдуқ.

Гогул торидин издәш арқилиқ, областлиқ 3-оттура мәктәпниң бирқанчә телефон номуриға телефон қилдуқ. Әмма қилған телефонлиримизниң мутләқ көп қисми уланмиди. Мәктәп илмий башқармисиға қилған телефонимизни алған әр хадим, телефонниң санҗи шәһәрлик маарип идарисигә уланғанлиқини билдүрди.

Бу хадимдин санҗи областлиқ 3-оттура мәктәпниң муавин мудири әкрәм исламниң әһвалини сориғинимизда у аввал санҗи шәһәрлик 3-оттура мәктәптә, аз санлиқ милләттин болған муавин мудирниң йоқлуқини билдүрди. Андин у телефонниң санҗи шәһәрлик маарип идарисигә урулғанлиқини тәкитләп, областлиқ 3-оттура мәктәпкә алақидар әһвалларни областлиқ маарип идарисидин соришимизни ейтти.

Әмма у йәнә областлиқ 3-оттура мәктәпниң илгири һәқиқәтән миллий оттура мәктәп икәнликини, әмма кейинчә хитайчә мәктәп билән қошуветилгәнликини, қалған конкрет әһвалдин өзиниң хәвири йоқлуқини билдүрди. Әмма униң авази аяғлашмайла телефон үзүлүп кәтти.

Тәкрар урған телефонимизни алған санҗи шәһәрлик маарип идарисиниң йәнә бир хадимидин, санҗи областлиқ 3-оттура мәктәпниң мудири исһақ вә муавин мәктәп мудири әкрәм исламниң қәйәрдә икәнликини сориғинимизда, у әһвалдин ениқ хәвири йоқлуқини билдүрди.

Областлиқ маарип идарисигә қилған телефонимизни бир аял хадим алди.

Униңдин областлиқ 3-оттура мәктәпниң муавин мудири вә мәктәп мудирлириниң әһвалини билмәкчи икәнликимизни соридуқ, у җаваб берип немә әһвал игилимәкчи икәнликимизни сориди.

Андин у мәктәпниң муавин мудири әкрәм исламниң тәрбийәләш мәркизигә елип кетилгәнликидин хәвири бар йоқлуқи һәққидики соалимизға җаваб берип, "шундақ" дәп тәстиқлиди.

Әмма униңдин униң немә сәвәбтин тутқун қилинғанлиқини сориғинимизда, у "бу ишлар бизниң даиримиздә әмәс, биз һазирчә сәвәбини ениқ билмәймиз" дәп җаваб бәрди.

Әмма областлиқ маарип идарисиниң бу аял хадимидин санҗи областлиқ 3-оттура мәктәпниң телефониниң немә үчүн уланмиди, мәктәп йәнила миллий оттура мәктәп һалитидиму яки өзгәртилдиму? дәп сориғинимизда у җаваб берип, һазир бу мәктәпниң миллий-хитай бирләштүрүлгән мәктәп икәнликини билдүрди.

2014-Йили америкаға кәлгәнликини билдүргән ризвангүл ханим йәнә өзиниң ана мәктипи санҗи областлиқ 3-оттура мәктәпниң хитай мәктипи билән қошуветилиштин илгирики вә кейинки әһвалларни аңлатти.

Униң билдүрүшичә, санҗи областлиқ 3-оттура мәктәп, 1980-1990-йилларда санҗидики бирдинбир уйғур-қазақ оқуғучилар оқуйдиған миллий оттура мәктәп икән. Мәзкур мәктәпкә санҗи областиға қарашлиқ наһийиләрдики уйғур вә қазақ балилири келип ятақта йетип оқуйдикән. У 1995-йили мәзкур мәктәпни түгәткән чағда мәктәпниң толуқ оттура қисмидила 2 синип уйғур, икки синип қазақ оқуғучи болуп, шу йили 160 оқуғучи мәктәп түгәткән. Шу йили мәктәпниң омумий оқуғучи сани 1000 нәпәрдин ашидикән.

Ризвангүл ханимниң билдүрүшичә, 2013-йили мәзкур оттура мәктәпниң толуқ оттура қисми, санҗидики хитай мәктипи йәни санҗи 1-оттура мәктипигә қошуветилгән. Мәктәпниң толуқсиз оттура мәктәп қисми санҗидики миллий 4-башланғуч мәктәп билән бирләштүрүлүп йәнила санҗи областлиқ 3-оттура мәктәп намида аталған. Таки 2018-йили униң қейинакиси әкрәм ислам тутқун қилинғанға қәдәр, мәктәпниң баш мудири вә муавин мудирлирилиқ вәзиписини уйғур вә қазақ оқутқучилар өтигән. Миллий оқутқучилар мәктәптә мутләқ үстүнлүкни сақлап кәлгәникән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт