Sanji oblastliq 3-ottura mektepning mu'awin mudiri ekrem islam tutqunda

Muxbirimiz méhriban
2020-10-22
Share
muawin-mektep-mudiri-Ekrem-Islam.jpg Sanji oblastliq 3-ottura mektepning mu'awin mudiri ekrem islam mukapatlash murasimida. (Waqti we orni éniq emes)
Rizwan’gül teminligen

Yéqinda radiyo anglighuchilirimizdin rizwan'gül xanim radiyomizgha uchur yollap, sanjidiki birdin bir Uyghur-qazaq ottura mektipi bolghan oblastliq 3-ottura mektepning Uyghur millitidin bolghan mu'awin mudiri ekrem islam, mektep mudiri is'haq mu'ellim we birqanche oqutquchining 2018-yili qishliq tetildin kéyin tutqun qilinip lagérgha élip kétilgenlikini bildürgenidi.

21-Öktebir küni amérikaning wirginiye ishtatidiki rizwan'gül xanim, radiyomiz Uyghur bölümi ziyaritini qobul qilip, mezkur mekteptin tutqun qilin'ghan mektepning mu'awin mudiri ekrem islamning özining qéyin akisi ikenlikini bildürüp, 2018-yili 2-ayning 5-küni sanjidiki öyidin tutup kétilgenlikidin yéqinda xewer tapqanliqini bildürdi.

Rizwan'gül xanim yene mezkur mektepning bash mudiri is'haq mu'ellim we uning mezkur mekteptiki ayali sha'adet mu'ellim, reyhan mu'ellim qatarliqlarningmu 2018-yili qishliq tetildin kéyin tutqun qilin'ghanliqi heqqide uchur alghanliqini bildürdi.

Rizwan'gül xanimning bildürüshiche, mektepning mu'awin mudiri ekrem islam, 1971-yili 7-ayning 17-küni tughulghan. U 1989-yilghiche sanji oblastliq 3-ottura mektepte oqughandin kéyin, shinjang uniwérsitétigha qobul qilin'ghan. 1994-Yili shinjang uniwérsitétining jughrapiye fakultétini püttürüp, ana mektipi sanji oblastliq 3-ottura mektepke jughrapiye oqutquchisi bolup teqsim qilin'ghan. Shundin buyan ekrem islam özining tirishchanliqi bilen közge körünüp köp qétim ilghar oqutquchi bolup teqdirlen'gen. 2013-Yili mezkur mektep sanjidiki xitay tilliq mektepler bilen birleshtürülgen. Bu mezgilde u oblastliq ma'arip idarisining orunlashturushida sanjidiki gungxu'a ottura mektipige yuqiri ma'ash bilen oqutquchiliq qilghan. Ekrem islam 2015-yili sanji oblastliq ma'arip idarisining orunlashturushi bilen sanji oblastliq 3-ottura mektepke mu'awin mektep mudiri qilip teyinlen'geniken.

Biz sanji oblastliq 3-ottura mekteptin tutqun qilin'ghan mektep mudiri is'haq we mektepning mu'awin mudiri ekrem islam heqqide ilgirilep ehwal igilesh üchün, gogul toridin izdesh arqiliq sanji oblastliq 3-ottura mektepke, sanji sheherlik ma'arip idarisi we sanji oblastliq ma'arip idarisi qatarliq jaylargha téléfon qilduq.

Gogul toridin izdesh arqiliq, oblastliq 3-ottura mektepning birqanche téléfon nomurigha téléfon qilduq. Emma qilghan téléfonlirimizning mutleq köp qismi ulanmidi. Mektep ilmiy bashqarmisigha qilghan téléfonimizni alghan er xadim, téléfonning sanji sheherlik ma'arip idarisige ulan'ghanliqini bildürdi.

Bu xadimdin sanji oblastliq 3-ottura mektepning mu'awin mudiri ekrem islamning ehwalini sorighinimizda u awwal sanji sheherlik 3-ottura mektepte, az sanliq millettin bolghan mu'awin mudirning yoqluqini bildürdi. Andin u téléfonning sanji sheherlik ma'arip idarisige urulghanliqini tekitlep, oblastliq 3-ottura mektepke alaqidar ehwallarni oblastliq ma'arip idarisidin sorishimizni éytti.

Emma u yene oblastliq 3-ottura mektepning ilgiri heqiqeten milliy ottura mektep ikenlikini, emma kéyinche xitayche mektep bilen qoshuwétilgenlikini, qalghan konkrét ehwaldin özining xewiri yoqluqini bildürdi. Emma uning awazi ayaghlashmayla téléfon üzülüp ketti.

Tekrar urghan téléfonimizni alghan sanji sheherlik ma'arip idarisining yene bir xadimidin, sanji oblastliq 3-ottura mektepning mudiri is'haq we mu'awin mektep mudiri ekrem islamning qeyerde ikenlikini sorighinimizda, u ehwaldin éniq xewiri yoqluqini bildürdi.

Oblastliq ma'arip idarisige qilghan téléfonimizni bir ayal xadim aldi.

Uningdin oblastliq 3-ottura mektepning mu'awin mudiri we mektep mudirlirining ehwalini bilmekchi ikenlikimizni soriduq, u jawab bérip néme ehwal igilimekchi ikenlikimizni soridi.

Andin u mektepning mu'awin mudiri ekrem islamning terbiyelesh merkizige élip kétilgenlikidin xewiri bar yoqluqi heqqidiki so'alimizgha jawab bérip, "Shundaq" dep testiqlidi.

Emma uningdin uning néme sewebtin tutqun qilin'ghanliqini sorighinimizda, u "Bu ishlar bizning da'irimizde emes, biz hazirche sewebini éniq bilmeymiz" dep jawab berdi.

Emma oblastliq ma'arip idarisining bu ayal xadimidin sanji oblastliq 3-ottura mektepning téléfonining néme üchün ulanmidi, mektep yenila milliy ottura mektep halitidimu yaki özgertildimu? dep sorighinimizda u jawab bérip, hazir bu mektepning milliy-xitay birleshtürülgen mektep ikenlikini bildürdi.

2014-Yili amérikagha kelgenlikini bildürgen rizwan'gül xanim yene özining ana mektipi sanji oblastliq 3-ottura mektepning xitay mektipi bilen qoshuwétilishtin ilgiriki we kéyinki ehwallarni anglatti.

Uning bildürüshiche, sanji oblastliq 3-ottura mektep, 1980-1990-yillarda sanjidiki birdinbir Uyghur-qazaq oqughuchilar oquydighan milliy ottura mektep iken. Mezkur mektepke sanji oblastigha qarashliq nahiyilerdiki Uyghur we qazaq baliliri kélip yataqta yétip oquydiken. U 1995-yili mezkur mektepni tügetken chaghda mektepning toluq ottura qismidila 2 sinip Uyghur, ikki sinip qazaq oqughuchi bolup, shu yili 160 oqughuchi mektep tügetken. Shu yili mektepning omumiy oqughuchi sani 1000 neperdin ashidiken.

Rizwan'gül xanimning bildürüshiche, 2013-yili mezkur ottura mektepning toluq ottura qismi, sanjidiki xitay mektipi yeni sanji 1-ottura mektipige qoshuwétilgen. Mektepning toluqsiz ottura mektep qismi sanjidiki milliy 4-bashlan'ghuch mektep bilen birleshtürülüp yenila sanji oblastliq 3-ottura mektep namida atalghan. Taki 2018-yili uning qéyinakisi ekrem islam tutqun qilin'ghan'gha qeder, mektepning bash mudiri we mu'awin mudirliriliq wezipisini Uyghur we qazaq oqutquchilar ötigen. Milliy oqutquchilar mektepte mutleq üstünlükni saqlap kelgeniken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.