Учтурпан имамлиримдики җамбизим кочисидин лагерға әкетилгән 17 кишидин үчи өлгән, үчи мейип болған

Мухбиримиз шөһрәт һошур
2020.10.28
lager-saqchi-zongzuyup.jpg Лоп наһийәсидики 4-йиғивелиш лагеридики тутқунлар сиясий өгиништә. 2017-Йили март, хотән.
BITTER WINTER

Радийомизға кәлгән бир инкасқа асасән мухбиримизниң ениқлашлири давамида учтурпанниң имамлирим йезисидики узунлуқи бир километирчә келидиған, нопуси 180 әтрапида болған җамбизим намлиқ бир кочидин 3 йилниң алдида 17 киши лагерға әкетилгән. Нөвәттә булардин үчи лагерда җан үзгән, үчи лагердин мейип чиққан, бәш нәпири кесиветилгән, икки нәпири завутқа йолланған, қалған 5 нәпириниң из-дерики ғайиб болған.

Учтурпанлиқ муһаҗирлардин бири радийомизға учур йоллап, юрти учтурпан имамлиримдики җамбизим намлиқ кичиккинә бир кочидин 20 нәччә кишиниң лагерға әкетилгәнлики вә булардин үч кишиниң лагердин җәсити чиққанлиқини мәлум қилған иди. Биз бу учурни дәлилләш үчүн учтурпан наһийәси вә униң имамлирим йезисидики бир қисим алақидар хадимларға телефон қилдуқ. Телефонимизни қобул қилған имамлиримдики бир кәнт сақчиси мәзкур инкаста дейилгән җамбизим кочисиниң бир километирчә узақлиқта икәнлики вә нопусиниң 180 әтрапида икәнликини ашкарилиди.

Униң дейишичә, имамлиримдики12 ‏-кәнт4 ‏-гуруппиға тәвә бу кочидин абликим нияз, турғун мәмәт, керәм рахман қатарлиқ 17 киши лагерға әкетилгән. Булардин йеқинқи үч йил ичидә үч кишиниң лагердин җәсити чиққан. Лагерда җан үзгән бу үч киши 50 вә 55 яшлиқ абдусалам нияз вә мәмәт нияз ака-укилар вә 45 яшлиқ турди осман икән. Деһқанчилиқтин башқа иш-оқити болмиған, һәр бири 5-6 җанлиқ бир аилиниң дадиси болған бу үч кишиниң лагерға елип кетилиштин бурун сақ-саламәт кишиләр икәнлики мәлум. Әмма уларниң лагерда немә сәвәбтин җан үзгәнлики мәлум әмәс. Һәр үч киши учтурпандики көлими әң чоң болған, он миңдин артуқ киши қамалғанлиқи илгири сүрүлүватқан коңтәй лагерида җан үзгән.

Мәзкур кәнт сақчисиниң ашкарилишичә, бу 17 киши ичидин әнвәр тәвәккүл, турди худийәм, абләт бавудун қатарлиқ 3 киши мейип һаләттә кепилликкә қоюп берилгән. Булардин әнвәр тәвәккүл өпкә кесилигә, абләт бавудун бөрәк кесилигә гириптар болған. Турди худийәмниң путидин чатақ чиққан. Мәлум болушичә, 20 билән 30 яш арисидики бу үч киши бойи бир метир 80 сантиметирдин егиз, еғирлиқи нормал, лагерға елип кетилиштин аввал сағлам кишиләр болуп, уларниң конкрет немә сәвәбтин қисқиғинә үч йил ичидә мейип һаләткә кәлтүрүлгәнлики мәлум әмәс. Мәзкур 17 кишидин арзугүл сәмәт вә ханзөһрә сәйидәхмәт ақсудики завутқа мәҗбури ишчилиққа әвәтилгән. Абләт абликим, салам барат, керәм рахман қатарлиқ бәш киши үстидин кесим кесилип түрмигә йолланған. 17 Кишидин қалған 4 нәпириниң нөвәттә из-дерики мәлум әмәс.

Бу кәнт сақчисиниң ашкарилишичә, мәзкур 17 киши олтурушлуқ җамбизим кочиси 12‏-кәнтниң техи лагерға әкитилгәнләр нисбәтән азрақ болған 4-гуруппсға тәвә болуп, 3 миң нопуслуқ бу кәнттин кесиветилгәнләрниң санила 200 әтрапида икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.