Ғулҗа араөстәңдә икки кишиниң қамал мәзгилидә ачлиқтин өлгәнлики дәлилләнди

Мухбиримиз шөһрәт һошур
2022.09.09
Share on WhatsApp
Share on WhatsApp
Ғулҗа араөстәңдә икки кишиниң қамал мәзгилидә ачлиқтин өлгәнлики дәлилләнди Ғулҗадики аһалиләрниң қамал мәзгилидә ачлиқ кризисиға дуч кәлгәнлики үчүн наразилиқ билдүрмәктә. 2022-Йили сентәбир.
Social Media/Tiktok

Ғулҗада бир қисим аһалиләрниң ачлиқ кризисиға дуч кәлгәнлики вә буниң өлүм-йетим ишлириға сәвәп болғанлиқи иҗтимаий таратқуларда изчил һалда хәвәр қилинмақта.

Мухбиримизниң бу һәқтики ениқлашлири давамида, ғулҗаниң араөстәң йезисида икки кишиниң мушу қетимлиқ қамал мәзгилидә ачлиқтин өлгәнлики дәлилләнди.

Биз ғулҗадики аһалиләрниң қамал мәзгилидики қийинчилиқлири һәққидә мәлумат елиш үчүн, асасий қатламлардики бир қисим аһалиләргә телефон қилдуқ. Телефонимизға еһтият билән җавап бәргән аһалиләр өз турмушиниң нормал икәнликини баян қилди. Һалбуки, иҗтимаий таратқуларда аһалиләрниң ачлиқ кризисигә дуч кәлгәнлики вә бу кризисиниң өлүм-йетим ишлириға йол ечиватқанлиқи һәққидә учурлар тарқалмақта.

Ғулҗадики қамал мәзгилидә вирусниң алдини елиш хадимлири кочиларда чарлап йүргән көрүнүш. 2022-Йили сентәбир.
Ғулҗадики қамал мәзгилидә вирусниң алдини елиш хадимлири кочиларда чарлап йүргән көрүнүш. 2022-Йили сентәбир.
Social Media/Tiktok

Аһалиләрдин бири, ғулҗа наһийәсиниң араөстәң йезисида икки кишиниң мушу қетимлиқ қамал мәзгилидә озуқ-төлүк вә дора йетишмәсликтин җан үзгәнликини тилға алди. Телефонимизни қобул қилған мәзкур йеза гүркирәтмә кәнтиниң қоғдаш хадими, бу йезида икки кишиниң қамал мәзгилидә җан үзгәнликини инкар қилмиди, әмма у бу икки кишиниң кимликлири һәққидики соалимизға, бу йезида 12 кәнт барлиқи, аһалилириниң һәммисини тонумайдиғанлиқини баһанә қилип көрситип, бу һәқтә җавап бериш үчүн алақидар мәсул хадимлардин мәлумат елишимиз керәкликини тилға алди. Биз униңдин бу икки кишиниң конкирет өлүм сәвәбини сориғинимиздиму, у бу һәқтә алақидар мәсул хадимлардин мәлумат алмай туруп җавап берәлмәйдиғанлиқини ейтти.

Телефонимизни қобул қилған гүркирәтмә кәнтиниң бир хадимиму, өзиниң хизмәткә йеңи икәнликини сәвәб қилип көрситип, икки кишиниң өлүми һәққидики соалимизға җаваб бәрмиди.

Ахирида телефонимизни қобул қилған кәнт аяллар мудири, йезида ачлиқ кризисидин өлгән икки кишиниң бири әр, бири аял икәнликини ашкарилиди. У өлгән әр кишиниң савут турсун исимлик бирси икәнлики, униң озуқ-төлүк вә дора қейинчилиқиға дуч келип, 10 күндин кейин һаятидин айрилғанлиқини дәлиллиди. У йәнә бу мәһәллидә йеқинқи 10 күн ичидә өлгән йәнә бир кишиниң гүлбәһрәм исимлик бир деһқан аял икәнликини ашкарилиди. Мәзкур икки өлүм һәққидә дәсләптә йип учи бәргән аһалә, өлгүчиләрдин бириниң дорси йетишмәслик, йәнә бирсиниң болса қамал кәлтүрүп чиқарған бир хапилиқлар сәвәблик җан үзгәнликини, бу хапилиқтин өлгүчиниң әслидә йошурун йүрәк кесили бар икәнликини илгири сүргән иди. Мәзкур аяллар мудири, савут турсунниң йүрәк кесли қозғилип өлгәнликини ашкарилиди, әмма гүлбәһрәмниң өлүми һәққидә мәлумати йоқлуқини ейтти.

Йәнә илгириләп елип барған ениқлашлиримиз давамида бир кәнт хадими араөстәңдики мәзкур икки кишиниң ачлиқтин өлгәнликини дәлиллиди.

Соал: тәвәликиңиздики гүлбәһрәм дегән аялдин һал сорап барған вақтиңиз барму?

Җавап: у бәк аз гәп қилидиған аял, пәқәт дәрт ейтмайду?

Соа: ундақта, уяқниң ачлиқтин өлгәнлики раст охшимамду?

Җавап: чоқум шундақ дәп билимән.

Соал: ундақта, савут турсунчу ?

Җавап: у акимизму озуқ-төлүк йетишмәй ачлиқтин өлгән.

Һөрмәтлик радийо аңлиғучилар, төнүгүн торға чиққан учурда бир аилидин 4 өсмүр балиниң еғир ағрип һаяти хәтәрлик басқучта туриватқанлиқи шикайәт қилинған иди. Бүгүнки бир учурда бир өсмүр қизниң өйидә ялғуз җан үзгәнлики инкас қилинған.

Өткән һәптидики ениқлашлиримизда, ғулҗа наһийәсиниң қараяғач йезисидики мәвлан сидиқ дегән кишиниң қамал мәзгилидә дориси вақтида йетип кәлмигәнлики үчүн җан үзгәнлики ашкариланған иди. Алақидар хадимлардин бири, ғулҗа наһийәсидә аз дегәндә 12 кишиниң қамал кәлтүрүп чиқарған қийинчилиқлардин җан үзгәнликини тилға алған иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.