Toqquzaqta mejburiy emgekke ewetilgen ikki ottura mektep oqughuchisining otta köyüp ölgenliki ashkarilandi

Muxbirimiz shöhret hoshur
2021-02-16
Share
Toqquzaqta mejburiy emgekke ewetilgen ikki ottura mektep oqughuchisining otta köyüp ölgenliki ashkarilandi Uyghur diyaridiki mejburiy emgekke béghishlap ishlen'gen karton.
Yettesu

Muhajirettiki toqquzaqliqlardin biri radiyomizgha uchur yollap, özining yurtidiki uruq-tughqanliridin 16 yashliq nebijan rozining paxta térishqa ewetilgen aqsuda otta köyüp ölüp ketkenlikini melum qildi. Muxbirimizning bu heqtiki éniqlishida mezkur weqening ötken yili öktebirde paxta tergini barghan oqughuchilar qonalghusida yüz bergenliki we weqede ikki kishi ölüp we 4 kishi yarilan'ghanliqi aydinglashti. Töwende muxbirimiz shöhret hoshurning bu heqte teyyarlighan programmisi diqqitinglarda bolidu.

Toqquzaqliq muhajirlardin biri özining bulaqsu, qarabagh 14 ‏-kent 2‏-mehellide yashaydighan tughqanliridin rozi toxtining oghli nebijan rozining ötken yili 10-ayda oquwatqan mektipi teripidin aqsugha paxta térishqa ewetilgenliki we shu mezgilde bir ot kétish weqesi yüz bérip, uning otta köyüp ölgenlikini melum qildi. Biz bu weqe heqqide melumat élish üchün qeshqer konasheher, yeni toqquzaq nahiyesidiki bir muqimliqqa mes'ul xadimdin melumat soriduq. U deslepte özining bu weqedin xewersizlikini éytti. Emma biz weqening birqisim yip uchlirini dep bergendin kéyin, özining mushu xil bir weqedin xewiri barliqi, emma, weqening tepsilatini bilmeydighanliqini éytti. Biz bu xadim teminligen yip uchlirigha asasen, toqquzaqtiki bir mektep rehbirige téléfon qilduq. U otta köyüp ölgen oqughuchining nahiyelik emes, yéziliq ottura mektep oqughuchisi ikenlikini ashkarilidi. Éniqlashlirimiz dawamida ahalilerdin biri ot kétish weqesining aqsudiki bir paxtizarliqta paxta tériwatqan oqughuchilar üchün hazirlan'ghan bir kepide yüz bergenlikini tilgha alsa؛ yene bir ahale, weqening paxtizarliqqa yéqin jaydiki bir mektepning oqughuchilar yatiqida yüz bergenlikini bayan qildi. Ilgirilep élip barghan éniqlashlirimiz dawamida, özining mezkur weqe yüz bergen meydanda qutquzush ishigha qatnashqanliqini bayan qilghan bir xadim, shu künki ot kétish weqeside ikki kishining hayatidin ayrilghanliqi we 4 kishining éghir yarilan'ghanliqini ashkarilidi. Uning déyishiche weqe seher sa'et 3 ke yéqin yüz bergen. Melum bolushiche, paxta térishqa kelgen oqughuchilar yatqan yataqtin is-tütek kötürülüwatqanliqini körgen etraptiki alaqidar xadimlar, weqe meydanigha yétip kélip, ot ketken yataqtin ikki jeset we 4 yaridarni sirtqa élip chiqqan.

Mezkur xadim özi yataq dep tilgha alghan orunning paxta étizidiki bir kepe ikenliki we yaki paxta étizigha yéqin bir mektep oqughuchiliri yatiqi ikenliki heqqidiki so'alimizgha néme üchündur jawab bermidi.

Ilgiriki éniqlashlirimiz dawamida, Uyghur rayonida lagérlar tesis qilinip mutleq köp sandiki er emgek küchi lagérlargha solan'ghandin kéyin, étiz-ériq ishlirini ayallar we balilarning, bolupmu, pida'iylar namidiki ottura mektep oqughuchilirining qiliwatqanliqi ashkarilan'ghan. Yene ilgiri aqsu qatarliq jaylargha paxta térishqa bériwatqan ishlemchiler, lagérgha solinip qalghandin kéyin, da'irilerning déhqanchiliqning aldirash mezgilliride ottura mektep oqughuchilirinimu mejburiy emgekke salghanliqi köp qétim delillen'genidi.

Toqquzaqliq muhajirning radiyomizgha inkas qilishiche, uning otta köyüp ölüp ketken 16 yashliq tughqini nebijan rozining dadisi rozi toxtimu lagérda iken. Nebijan aqsudiki mejburiy emgekke, yeni paxta térishqa akisi abduraxman bilen birlikte ewetilgeniken.

Ashkarilan'ghan uchurlardin, aqsuda paxta tériwatqan oqughuchilarning qonalghusida yüz bergen ot kétish weqeside ölgen ikkinchi kishining kim ikenliki melum emes. Merhum nebijan rozining akisi abduraxmanning hayat ikenliki melum bolsimu, uning yarilan'ghuchilar arisida bar-yoqluqi we hazirqi salametlik ehwali téxi éniq emes.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet