Korona wirusi yuqumi seweblik qeshqer wilayiti qamal qilindi

Muxbirimiz méhriban
2020-10-28
Élxet
Pikir
Share
Print
Kiyim-kéchek zawutining 17 yashliq xizmetchisi korona wirusi bilen yuqumlan'ghanliqi éniqlan'ghandin kéyin, 4 milyon 750 ming ahalini tekshürüp bolushtek keng kölemlik korona wirus siniqi bashlan'ghan. 2020-Yili 25-öktebir, qeshqer.
Kiyim-kéchek zawutining 17 yashliq xizmetchisi korona wirusi bilen yuqumlan'ghanliqi éniqlan'ghandin kéyin, 4 milyon 750 ming ahalini tekshürüp bolushtek keng kölemlik korona wirus siniqi bashlan'ghan. 2020-Yili 25-öktebir, qeshqer.
AFP

Xitay taratquliri 24-öktebir xewer bérip, qeshqerning toqquzaq nahiyiside tajsiman wirus, yeni korona wirusi yuqumi bayqalghanliqini we yuqum rayonining kontrol qilin'ghanliqi élan qildi.

Birnechche kündin buyan xitay taratqulirida qeshqer konasheher rayonidiki bir zawutta ishlewatqan bir Uyghur qizining ata-anisini yoqlash sewebidin yuqumlan'ghanliqi, shuningdin kéyinki yuqumlan'ghuchilarning sani heqiqide yéngilan'ghan xewerler bérilmekte.

Xitayning 25-öktebirdiki xewiride qeshqerdiki tekshürüsh netijiside yuqumlan'ghan qiz we uning ata-anisidin bashqa yene 137 neper alametsiz yuqumdar bayqalghanliqi xewer qilindi. 26-Öktebirdiki xitay xewiride alametsiz yuqumdarning 138 neper ikenliki, 3 milyon'gha yéqin kishining tekshürülgenliki, 27-öktebirgiche qeshqer rayoni we uning etrapidin 4 milyondin artuq kishini tekshürüsh wezipisi tamamlinidighanliqi xewer qilindi.

Radiyomiz yerliktin ehwal igilesh üchün 27-öktebir etigenlik xizmet waqtida qeshqer wilayetlik hökümet ishxanisi we qeshqerdiki birqanche doxturxanigha téléfon qilduq.

Hökümet organlirigha qilghan téléfonimiz we qeshqer wilayetlik 1-doxturxanigha qilghan téléfonimiz ulan'ghan bolsimu, emma jawabsiz qaldi.

Qeshqer wilayetlik 2-doxturxanigha qilghan téléfonimiz ulandi.

Deslep téléfonni alghan xizmetchi xadim yuqumlinishni kontrol qilish ehwali heqqidiki so'alimizgha jawab bérip, "Ehwal intayin yaxshi" ikenlikini bildürdi.

Emma téléfon 20 sékonttin kéyinla üzülüp qalghandin kéyin, eyni téléfon nomurigha tekrar téléfon qilduq.

Bu qétim téléfonni eyni xadim aldi. U awwal yuqum ehwalini tekshürüsh üchün doxturxanida qandaq resmiyetler ötülidighanliqi heqqide sorighan so'alimizgha jawab bérip, yuqum ehwalini tekshürüsh üchün doxturxanigha kelgenlerning choqum maska taqaydighanliqini bildürdi.

Bu xadim yene téléfonning néme üchün qoyuwétilgenlikini sorighandin kéyin, eger tekshürüsh obyékti qeshqerde bolsila doxturxanigha kelmeymu, herqaysi ahaliler kométitidila yuqum ehwalini tekshürgili bolidu, dédi.

Uningdin "Qeshqer shehiride yürgüzülgen qamal sewebidin aptomobillarning normal qatnishi qolaymu dep soriduq?" u bu mesilining doxturxanining bashqurush da'iriside emeslikini bildürüldi. Uning sözi ayaghlashmayla téléfon yene aptomatik üzüldi.

3-Qétim tekrar téléfon qilduq.

Bu qétimmu téléfonimizni eyni ayal xadim aldi. Emma bu qétim u téléfonning doxturxanining kadirlar bölümige urulghanliqini eskertip, yuqum we bimarlargha munasiwetlik ehwallarni dawalash bölümidikilerdin sorashni tekitlidi. Uningdin "Qeshqerde yuqumdarlar 138 ge yétiptu, qeshqerdiki yuqumlinish weziyiti éghirmu?" dep soriduq. Bu xadim térikken halda jawab bérip:

"Hazir bu ehwallarni téléfonda sorash muwapiq emes, men sizning bu télifoningizdin ensizlik hés qiliwatimen, siz sorashqa bolmaydighan bezi mesililerni sorawatisiz," dédi.

Uningdin "Néme üchün sorashqa bolmaydu?" dep tekrar sorighinimizda, u téximu jiddiyleshken we térikken halda jawab bérip: "Néme üchünlükini sorimang, méning hazir sizge bu ehwallarni chüshendürüshke waqtim yoq, emdi téléfon qilmang, téléfonning tekrar-tekrar üzülüp ketkinidin biliwatisizghu," dédi we téléfonni qoyuwetti.

Biz yenimu ilgirilep ehwal éniqlash üchün 2-doxturxanining késeller bölümige téléfon qilduq, emma bu yerdimu téléfon tekrar üzülüsh, téléfonni alghan tébbiy xadimlarning so'allirimizgha jawab bérishtin özini qachurush ehwalliri körüldi.

Xitayning shinxu'a agéntliqining 27-öktebirdiki xewiride qeshqerdiki yuqumlan'ghanlar sanining 27-öktebir küni 5 neper ikenliki, alametsiz yuqumdarning sani 160 tin ashqanliqi, 27-öktebir kéch sa'et 12 ge qeder pütkül qeshqer rayonida texminen 4 milyon 600 minggha yéqin kishining yuqumlinishtin tekshürüsh xizmiti tamamlinidighanliqi xewer qilindi.

Amérika kolombiye uniwérsitétining tetqiqatchisi, tébbiy penler doktori memet imin ependi 2020-yili xitayning wuxen shehiridin "Wuxen wirusi" namida tarqalghan, kéyin "Korona wirusi" dégen nam bérilip, pütkül dunyawi yuqum apitige aylan'ghan yuqum weziyitini yéqindin közitip kéliwatqan Uyghur pa'aliyetchilirining biri.

Memet imin ependi 27-öktebir radiyomiz ziyaritini qobul qilip, 24-öktebirdin bashlap qeshqer shehirining "Yuqum rayoni" namida qamal qilinishi we da'irilerning yuqum bahaniside élip bériwatqan bu xil qamallirining sewebi we meqsitining guman qozghaydighanliqini bildürdi.

Memet imin ependi bu yil 7-ayning 15-künidin 9-ayning 1-künige qeder Uyghur rayonining merkizi ürümchi shehirimu yuqum sewebidin ikki aygha yéqin qamal qilin'ghanliqini tilgha élip, eyni chaghdiki qamal weziyitiningmu guman qozghighanliqi we ürümchidiki yuqum weziyitining sewebi we meqsiti heqqide her xil perezler otturigha chiqqanliqini bildürdi.

U bu yil 7-ayda yüz bergen ürümchidiki yuqumlinish we uningdin kéyinki qattiq qamal we nöwette qeshqerde bashlan'ghan qamal heqqide öz qarashlirini otturigha qoyup ötti.

U bu ehwalning korona wirusidin yuqumlinish dunyawi apetke aylan'ghan, herqaysi döletlerde yuqumdin mudapi'elinish waksinisi we ünümlük dora tetqiqati jiddiy dawamlishiwatqan bir weziyette, tébbiy sahedikiler arisidila emes, belki yuqum weziyitige diqqet qiliwatqan kishiler arisidimu her xil gumaniy so'allarni peyda qiliwatqanliqini bildürdi.

Pikirler (0)
Share
Toluq bet