Korona wirusi mezgilde xitay hökümitining Uyghur diyaridiki sayahet teshwiqati jiddiy inkas qozghidi

Muxbirimiz méhriban
2020-04-10
Élxet
Pikir
Share
Print
Süret, xitayning tengritagh uyghur toridin élinghan sayram köli boyidiki muhit asrash taxtisi astigha yighilip qalghan exletlerdin bir körünüsh.
Süret, xitayning tengritagh uyghur toridin élinghan sayram köli boyidiki muhit asrash taxtisi astigha yighilip qalghan exletlerdin bir körünüsh.
www.xjtsnews.com Din élindi.

Xitay da'iriliri yillardin buyan "Gherbiy rayonni échish we yardem bérish" namida Uyghur rayonigha xitay köchmenlirini yötkeshni dawamlashturup kelgen idi. Bolupmu yéqinqi birqanche yildin buyan xitay hökümiti "Éshincha emgek küchlirini ishqa orunlashturush" dégen namda Uyghur yashlirini türkümlep xitay ölkilirige yötkep, Uyghurlarning ana yurtidiki nopusini zor derijide tarqaqlashturdi we Uyghur medeniyitining rayondiki tesirini suslashturdi.

2020-Yili 3-ayning axiridin bashlap xitay hökümet taratqulirida Uyghur aptonom rayonida 2020-yilliq sayahet ishlirining janlandurulidighanliqi heqqidiki teshwiqatlar kücheydi.

8-Aprél küni "Tengritagh tori" da "Chéchek mezgilide güzel shinjangda sayahette bolung, mezzilik ta'amlardin huzurlining, güldin güzel Uyghur qizliri sizni kütüwalidu!" serlewhelik teshwiqat élani bérilgen. Bu élanda Uyghur rayonining özgiche güzel sayahet nuqtiliri teshwiq qilin'ghandin bashqa yene nuqtiliq halda Uyghur ta'amlirining mezzilikliki, Uyghur qizlirining güzelliki qatarliq mezmunlar asasiy téma qilin'ghan.

Uyghur rayonidiki herqaysi oblast-wilayetlerning hökümet toridin melum bolushiche, da'iriler herqaysi yéza-mehellilerdiki Uyghurlarni teshkillep, 4-ay mezgilidiki "Chéchek bayrimi sayahiti" ge qarita teshwiqat pa'aliyetlirini kücheytken.

Biz bu heqte ehwal igilesh üchün "Örük makani" dep atalghan ghulja nahiyisige téléfon qilduq.

10-Aprél küni ghulja nahiyesidin téléfonimizni alghan bir xanimning bildürüshiche, ularning yézisida chéchek bayrimi ötken hepte ayaghlashqan. Emma bu yilliq chéchek bayrimi mezgilide sayahetchiler intayin az bolghan.

10-Aprél küni ghulja nahiyisidin ziyaritimizni qobul qilghan yene bir Uyghur gerche hökümet sayahetchilikni teshwiq qiliwatqan bolsimu, emma ularning yézisida bu yilliq chéchek bayrimi mezgilide yillardikidek sayahet pa'aliyetliri bolmighanliqini bildürdi.

Melum bolushiche, yéqinda Uyghur aptonom rayonluq sayahet idarisi teripidin élan qilin'ghan sayahet teshwiqat xewerliride asasliqi xitay ölkiliridiki xitay puqralirini Uyghur rayonigha jelp qilish asasiy nishan qilin'ghan iken.

Uyghur aptonom rayonluq sayahet idarisining toridin melum bolushiche, Uyghur aptonom rayonida 2020-yilliq sayahet pilanida jaylardiki sayahet ömeklirining 4-aydin 6-ayghiche, 6-aydin 9-ayghiche, 10-aydin 12-ayghiche üch pesilge bölüp, 3 künlüktin 15 kün'giche sayahet ömiki teshkillise bolidighanliqi uqturulghan.

Biz bu heqte téximu ilgirilep ehwal igilesh üchün Uyghur aptonom rayonluq sayahet idarisige téléfon qilduq. Emma téléfonimizni alghan xitay ayal xadim téléfonning xata urulghanliqini éytip téléfonni qoyuwetti.

Yene bir xadim bolsa 2020-yilliq sayahet uchurlirini tordin izdise bolidighanliqini éytip, sayahetchilik heqqidiki so'allirimizgha jawab bérishni ret qildi.

Yéqinqi birqanche yildin buyan xitay hökümitining milyonlighan Uyghurlarni lagérlargha qamishi xelq'aragha ashkarilan'ghan shundaqla xitayda peyda bolghan korona wirusi yuqumi pütkül dunyagha jiddiy tarqawatqan mezgilde xitay da'irilirining Uyghur diyarida sayahetchilikni kücheytish heqqide nishanliq teshwiqatlarni qanat yaydurushi chet'ellerdiki weziyet analizchiliri we Uyghur pa'aliyetchilirining jiddiy inkasini qozghidi.

5-Aprél küni amérikadiki "Wayréd" tor zhurnilida "Shinjangda sayahetchilik Uyghur medeniyitining axirqi izlirini yoqatmaqta" serlewhelik maqale élan qilindi.

Maqalide 2019-yili Uyghur rayonida ziyarette bolghan firansiyelik patrik wakning sözi neqil keltürülüp, hazir bu rayonda en'eniwi Uyghur medeniyiti izlirining asasen ghayib boluwatqanliqi, hazir Uyghur ayallirining hijap taqimaydighanliqi, musulmanliq yaki ottura-sherq tipidiki herqandaq simwollarning öchürülgenliki, mezkur rayonning hazir "Pütünley bashqiche bir jay" gha aylinip qalghanliqi otturigha qoyulghan.

Maqale aptori patrik wak 2019-yildin burun Uyghur rayonida bir qanche qétim ziyarette bolghan. U mezkur maqaliside özining yéqinda körgen ehwallardin heyran qalghanliqini bildürgen. Uning bildürüshiche, kochilarda 20 yashtin 60 yashqiche bolghan erkekler qalmighan. Maqalide yene Uyghur erkeklirining yéqinqi 3 yildin buyan mutleq köp qismining tutqun qilinip, lagérlargha élip kétilgen bolushi mumkinliki tekitlen'gen. U Uyghur rayonidiki sheherlerning pütünley xitay sheherlirige oxshap qalghanliqi, Uyghurlarning muqeddes jayliri bolghan meschitler we en'eniwi milliy uslubtiki Uyghur mehellilirining zor köp qismi chéqiwétilgenliki yaki bir qismining saqlap qélinip, köngül échish sorunlirigha aylandurulghanliqini tilgha alghan.

Patrik wak yene atalmish xitay sayahetchiliri heqqidimu toxtalghan. Patrik wak maqaliside xitay sayahetchilirining Uyghur medeniyiti we tarixigha gheyriy bir xil köz bilen qaraydighanliqi, shundaqla "Uyghur medeniyitining xitay tarixigha baghlinip, yoqitishqa uchrawatqanliqi" ni ilgiri sürgen. Maqalide bayan qilinishiche, "Shinjang" dep atiliwatqan Uyghur rayoni hazir xitay sayahetchilirining seyligahigha aylinip qalghan. Xitay sayahetchilirini jelp qiliwatqini rayonning qumluq menzirisi shundaqla "Shinjang yipek yolining tügüni" déyiliwatqan romantiklashturulghan tarixiy teshwiqat iken.

Dunya Uyghur qurultiyining xitay ishliri mudiri ilshat hesen ependimu 9-aprél ziyaritimizni qobul qilip, xitay hökümitining Uyghur diyarida sayahetni janlandurush teshwiqatigha diqqet qiliwatqanliqini bildürdi.

Ilshat hesen ependining qarishiche, 2020-yilining béshida xitaydin tarqalghan korona wirusi yuqumining wehimisi téxi pütünley yoqalmay turup, xitay da'irilirining Uyghur rayonida atalmish sayahetchilikni janlandurush teshwiqatini qilishi xitayning Uyghurlar olturaqlashqan bu rayonni xitaylashturush siyasiy pilanining bir parchisi iken.

Ilshat hesen ependi xitay da'iriliri ning 2-ayning axiridin bashlap, Uyghur yashlirini ishqa orunlashturush namida yuqum éghir bolghan xitay sheherliridiki zawutlargha yötkigenlikini bayan qildi. U xitay sayahetchilirini Uyghur diyarigha jelp qilish meqset qilin'ghan bu xil sayahet teshwiqatlirining xitayning Uyghur rayonigha téximu köp köchmen yötkesh istratégiyesining bir parchisi ikenlikini tekitlidi.

Ilshat ependining ilgiri sürüshiche, xitay sayahetchiliri nishan qilin'ghan bu xil sayahet teshwiqatlirida diqqet qozghaydighan bir nuqta rayondiki Uyghurlarning medeniyet kimlikini pütünley yoqitip, rayonni pütünley xitaylashturush we shu arqiliq téximu köpligen xitaylarni Uyghur diyarida yerliship qélishqa qiziqturush iken.

Toluq bet