Корона вирусиниң явропадики тәһликиси

Ихтиярий мухбиримиз әкрәм
2020-03-05
Share
firansiye-virus.jpg Таҗсиман вирус дуняға вәһимә елип келиватқан мәзгилдә саяһәтчиләр маска тақап парижни саяһәт қилмақта. 2020-Йили 5-март, фирансийә.
AP

5-Март күнигичә дуня бойичә корона вирусида өлгәнләрниң сани 3303 кишигә, юқумланғанларниң сани 96 миң 717 кишигә йәткән.

5-Март күни мәтбуатлар корона вирусиға даир әң йеңи учурларни елан қилди. Истатистекилиқ мәлуматларға асасланғанда 5-март күни чүштин кейин саәт 15:00 кә қәдәр дуня бойичә корона вирусида өлгәнләрниң сани 3303 кишигә, юқумланғанларниң сани 96 миң 717 кишигә йәткән. Буниң ичидә хитайда юқумланғанларниң сани 80 миң 411 кишини, өлгәнләрниң сани 3013 кишини, униң тәркибидә уйғур диярида өлгәнләрниң сани 3 кишини тәшкил қилған.

Явропа мәтбуатлирида җиддий тема болуватқини бүгүнгә қәдәр италийәдә юқумланғанлар саниниң 3089 кишигә өрлигәнлики, өлгәнләр саниниң 107 кишигә йәткәнлики болди. 4-Март күни италийә һөкүмити йәслидин тартип алий мәктәпләргичә болған пүтүн мәктәпләрдә оқуш тохтатқанлиқини җакарлиғаниди.

5-Марттики мәтбуат хәвәрлиридә баян қилинишичә, корона вирусиниң явропа иттипақиға әза 27 дөләттә тарқилиш сүрити тиз ешиватқан болуп, фирансийәдә юқумланғанларниң сани 285 кишигә, германийәдә 262 кишигә, испанийәдә 222 кишигә, шиветсарийәдә 90 кишигә, норвегийәдә 56 кишигә, голландийәдә 38 кишигә, шиветсийәдә 35 кишигә вә австрийәдә 29 кишигә йәткән. явропа иттипақиға әза башқа дөләтләрдиму аз дегәндә 1 дин 16 гичә кишиниң бу вирус билән юқумланғанлиқи ашкариланған.

Корона вирусиниң бундақ тиз сүрәттә тарқилиши явропа хәлқини сарасимигә салған. Германийәдә болғиниға охшаш, явропадики башқа дөләтләрдиму истемал буюмлирини талишип сетивалидиған һадисиләр йүз бәргән. Дезинфексийә суюқлуқи вә маска йетишмәслик келип чиққан. Италийәдә маскиниң нәрхи өрләп кәткән. Алдинқи һәптиләр италийә африқидин 800 миң данә маска киргүзгән болуп, йәнә 10 милйон данә маскиға җиддий еһтияҗи баркән.

Шиветсийә, австрийә, германийә қатарлиқ дөләтләр италийә вә ирандин кәлгән кишиләрни чеграда тәкшүрүп киргүзидиған болған. Чүнки, италийә корона вирусини явропаға тарқитиватқан асаслиқ дөләт болупла қалмай, иранму хәтәрлик дөләткә айланған. Иранда юқумланғанларниң сани 3513 кишигә, өлгәнләрниң сани бүгүн 107 кишигә йәткән.

Шиветсийә һөкүмити 1 миңдин артуқ адәм топлишидиған һәрқандақ йиғилишларни чәкләш тоғрисида уқтуруш чиқарған. Германийә һөкүмити бәзи мәктәпләрни тақиған вә хәлқаралиқ чоң көргәзмиләрни бикар қилған. явропадики башқа дөләтләрму бу вирусқа қарши түрлүк тәдбирләргә мураҗиәт қилған.

Белгийәдики уйғур зиялийси яшар әпәндиниң билдүрүшичә, корона вирусидин әнсирәш белгийәдики хәлқ арисидиму бәлгилик дәриҗидә күчәйгән. Германийәдики уйғур зиялийси османҗан әпәнди бу һәқтә тохталғанда корона вируси сәвәблик өзиниң йеңи қурған дукинини ачалмиғанлиқини әскәртти. Норвегийәдики уйғур зиялийси бәхтияр әпәндиниң тилға елишичә, корона вируси норвегийәдиму җиддий мәсилиләрниң биригә айланған. Шиветсийәдики бир уйғур яш шиветсийә һөкүмитиниң бу вирусниң алдини елиш үчүн йетәрлик дәриҗидә тәдбир қолланмайватқанлиқини тәкитлиди.


Германийәниң N-TV қанилиниң 5-марттики хәвиридә баян қилинишичә, гәрчә коруна вирусиниң явропада тарқилиш сүрити тез, көлими кәң болсиму һәмдә нурғун җайларда истемал буюмлирини булап-талап сетивелиш һадисилири йүз бәргән болсиму, бу вирус германийәдә истемал буюмлири қийинчилиқини пәйда қилалмайдикән. Истемал буюмлири мутәхәссиси анаһита томисниң билдүрүшичә, германийәдә алдимиздики күнләрдә бәлгилик дәриҗидә дора қийинчилиқи йүз бериши мумкин икән, әмма германийә истемал буюмлири саһәси көп миқдарда ун, яғ, шекәр қатарлиқ буюмларни заказ қилған болуп, хәлқниң әндишиси орунсиз икән.

Корона вируси явропа хәлқидә зор әндишә пәйда қилипла қалмай, явропаниң иқтисадиғиму көп зиянларни елип кәлгән. FOX Қанили 5-март елан қилған” авиатсийә саһәси пул муамилә киризисигә охшаш корона вирусиниң тәһдитигә дуч кәлди “намлиқ хәвәргә қариғанда, ялғуз хәлқара авиатсийә саһәсила 2020-йили корона вируси сәвәблик 63 милярдтин 110 милярд долларға қәдәр зиян тартидикән. Германийәниң чоң авиатсийә ширкити болған луфтансаниң 750 йолучилар айропилани болуп, һазир 150 и иштин тохтиған.

Хәвәрләрдә тилға елинишичә, явропа дөләтлири 2020-йили киргәндин буян хитайға аран 4 миңдин артуқ машина сатқан болуп, 2019-йилиниң охшаш мәзгилигә селиштурғанда 97% аз болған. Башқа буюмларниң сетилишиму зор чәклимиләргә учриған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт