Wang yi norwégiyede kishilik hoquq organliri we hersahening küchlük qarshiliqigha duch keldi

Ixtiyariy muxbirimiz ekrem
2020-08-27
Élxet
Pikir
Share
Print
Xitay tashqi ishlar ministiri wang yining norwégiye ziyaritige qarshi naraziliq namayishtin körünüsh. 2020-Yili 27-awghust, norwégiye.
Xitay tashqi ishlar ministiri wang yining norwégiye ziyaritige qarshi naraziliq namayishtin körünüsh. 2020-Yili 27-awghust, norwégiye.
RFA/Ekrem

Xitay tashqi ishlar ministiri wang yining norwégiye ziyariti her sahe kishilik hoquq teshkilatliri we Uyghur, tibet, xongkongluqlarning ortaq qarshiliqigha duch keldi.

Bir heptilik yawropa ziyaritini bashlighan xitay tashqi ishlar ministiri wang yi 26-awghust gollandiyede ziyarette bolghan mezgilde "Yawropa sherqiy türkistan ma'arip jem'iyiti" yétekchilikidiki Uyghurlarning qarshiliq namayishigha uchrighan idi.

Bügün 27-awghust wang yi norwégiyege qedem bésishtin ilgirila norwégiye metbu'atliri köplep maqaliler élan qilip "Xitay-norwégiye iqtisadiy hemkarliqining norwégiyeni téximu ilgiriligen halda xitaygha béqindurush rolini öteydighanliqi" ni ilgiri sürüshken hemde xitayning Uyghurlar, xongkongluqlar, tibetlerge séliwatqan zulumini norwégiye hökümitining nezerdin saqit qilmasliqi lazimliqini tekitleshken.

"Norwégiye Uyghur komitéti" xadimlirining bildürüshiche, ular 26-awghust küni norwégiye tashqi ishlar ministirliqining asiya ishliri bölümige xet yézip "Xitayning jaza lagérliri we irqiy qirghinchiliq siyasiti, Uyghur ayallirigha yürgüzüwatqan mejburiy tughmasliq opiratsiyesi, mejburiy emgek, Uyghur perzentlirining ata-anisidin ayrilip xorlinish mesilisi, chet'eldiki Uyghurlarning nazaret qilinish mesilisi" qatarliqlarni bu qétimqi norwégiye-xitay söhbitide otturigha qoyushni telep qilip ijabiy jawabqa érishken. Norwégiye tashqi ishlar ministirliqining asiya ishliri bölümi "Bu mesililer bizning küntertibimizde" dep jawab yollighan.

"Norwégiye Uyghur komitéti" xadimlirining teminligen uchurlirigha asaslan'ghanda tünigün "Norwégiye Uyghur komitéti", "Norwégiye tibet komitéti", "Norwégiye xongkong komitéti", "Norwégiye teywen dostluq jem'iyiti", "Norwégiye qelemkeshler jem'iyiti", "Xelq'ara kechürüm teshkilatining norwégiye shöbisi", "Sitifanusaliyansen" namliq diniy jem'iyet, "Sitéfén ittipaqi we hélsinki komitéti" qatarliq 8 teshkilat xitay tashqi ishlar ministiri wang yining 27-awghusttiki norwégiye ziyaritige qarshi ortaq namayish ötküzüsh toghrisida birlikke kelgen we birleshme chaqiriq élan qilghan.

Bu hemkarliqning rohigha bina'en bügün, 27-awghust paytext oslodiki norwégiye bash ministirliq binasi aldida Uyghurlar, tibetler, xongkongluqlar, teywenlikler, xelq'ara kechürüm teshkilatining norwégiyediki tarmaq orginining xadimliri hemde yerlik hersahe kishilik hoquq teshkilatlirining ezaliri bolup köp sanda kishi bu birleshme namayishqa qatnashqan. Shuning bilen birge, yene yerlik kishilik hoquq teshkilatlirining hemkarliqida sikandinawiye méhmanxanisi aldida xitaygha qarshi axbarat élan qilish yighini bolup ötken.

"Norwégiye Uyghur komitéti" ning re'isi, "Uyghur edliye arxip ambiri" ning mes'uli behtiyar ömer ependi neq meydandin ziyaritimizni qobul qilip, namayishning ehwali toghrisida bizni etrapliq melumatlar bilen teminlidi. Uning bildürüshiche, bu pa'aliyetlerde bir qisim parlamént ezaliri we norwégiyediki nopuzluq muhim siyasiy zatlar nutuqlar sözlep xitayning Uyghurlar üstidin élip bériwatqan basturush siyasitini qattiq eyibligen.

Xitay tashqi ishlar ministiri wang yi bu qétimqi yawropa ziyaritide italiye, gollandiye, norwégiye, firansiye we gérmaniyedin ibaret 5 dölette ziyarette bolidighan bolup, 31-awghust bérlin´gha yétip kélidiken. D u q wang yining gérmaniye ziyaritige qarshi 1-séntebir küni paytext bérlinda keng kölemlik namayish élip baridiken.

Toluq bet