Firansiyede wang yigha, myunxénda chén chüen'gogha qarshi namayish élip bérildi

Ixtiyariy muxbirimiz ekrem
2020-08-28
Élxet
Pikir
Share
Print
Firansiyediki Uyghurlar, tibetler, xongkongluqlar, teywenlikler we hersahe kishilik hoquq pa'aliyetchiliri xitay tashqi ishlar ministiri wang yining ziyariti munasiwiti bilen ötküzgen xitaygha naraziliq namayishidin körünüsh. 2020-Yili 28-awghust, firansiye
Firansiyediki Uyghurlar, tibetler, xongkongluqlar, teywenlikler we hersahe kishilik hoquq pa'aliyetchiliri xitay tashqi ishlar ministiri wang yining ziyariti munasiwiti bilen ötküzgen xitaygha naraziliq namayishidin körünüsh. 2020-Yili 28-awghust, firansiye
RFA/Ekrem

Xitay tashqi ishlar ministiri wang yining yawropadiki 5 dölette élip barghan ziyariti türlük qarshiliqlargha duch keldi.

Yawropadiki 5 dölette chaqmaq tézlikide ziyarette boluwatqan xitay tashqi ishlar ministiri wang yi 26-awghust gollandiyede, 27-awghust norwégiyede Uyghurlarning küchlük qarshiliqigha duch kelgenidi. U 28-awghust firansiyege qedem qoyushi bilenla firansiyediki Uyghurlar, tibetler, xongkongluqlar, teywenlikler we hersahe kishilik hoquq pa'aliyetchilirining ortaq qarshiliqigha duch kelgen.

"Firansiye Uyghur birliki" teshkilatining mu'awin re'isi mirqedir mirzatning bildürüshiche, xitay tashqi ishlar ministiri wang yigha qarshi bu namayish paytext parizhdiki firansiye dölet mejlisining aldida jushqun keypiyat ichide ötküzülgen.

Bu namayishqa ishtirak qilghan firansiyediki Uyghur ziyaliysi ekber ependimu namayishning küchlük qarshiliq sadaliri ichide 2 sa'et dawam qilghanliqini, namayishta firansiye pirizdénti makrondin Uyghurlar mesilisige köngül bölüshni telep qilip sho'arlar towlan'ghanliqini eskertti.

Namayishta yerlik kishilik hoquq teshkilatlirining mes'ullirimu nutuqlar sözlep xitay hakimiyitining Uyghurlar, tibetler, xongkongluqlar, teywenliklerge séliwatqan zulumliri hem bésim siyasitini qattiq eyibligen.

Xitay tashqi ishlar ministiri wang yining yawropadiki 5 dölette élip baridighan ziyaritining axirqi békiti gérmaniye bolup, u gérmaniye paytexti bérlinda ziyarette bolidiken. D u q ning teshkillishi bilen myunxén shehiridin bir bölük Uyghurlar 31-awghust kechte yolgha chiqip 1-séntebir bérlin'gha yétip bérip wang yining gérmaniye ziyaritige qarshi keng kölemlik namayish élip baridiken.

28-Awghust yene gérmaniyening myunxén shehiridiki xitay konsulxanisi aldida Uyghur aptonom rayonluq partkomning sékrétari chén chüen'goning wezige olturupla Uyghur diyarida jaza lagérlirini qurghanliqi we irqiy qirghinchiliqni bashlighanliqining 4 yilliqi munasiwiti bilen naraziliq namayishi ötküzülgen.

Myunxén shehiridiki xitay konsulxanisi aldida ötküzülgen bu namayishni "Yawropa sherqiy türkistan birliki" teshkilati bilen "Xeter astidiki xelqler teshkilati" birlikte uyushturghan. "Yawropa sherqiy türkistan birliki" teshkilatining re'isi esqerjan ependi ziyaritimizni qobul qilghanda bu qétimqi namayishning meqsiti toghrisida toxtaldi.

Toluq bet