Washin'gtonda “5-Iyul ürümchi qirghinchiliqi” ning 14 yilliqi munasiwiti bilen üch jayda namayish ötküzüldi

Bügün, yeni 5-iyul küni amérika paytexti washin'gtonda “5-Iyul ürümchi qirghinchiliqi” ning 14 yilliqini xatirilesh munasiwiti bilen üch jayda xitaygha qarshi naraziliq namayishi ötküzüldi.

Buningdin 14 yil burunqi bügünki künde, Uyghur diyarining merkizi ürümchi shehiride dunyani zilzilige keltürgen “5-Iyul ürümchi  qirghinchiliqi”  yüz bergen idi. Shuningdin étibaren, dunyaning herqaysi jaylirida yashawatqan muhajirettiki Uyghur jama'iti bu qanliq künni xatirilep,  yighilish uyushturush, namayish ötküzüsh we bashqa oxshimighan shekillerdiki türlük pa'aliyetler arqiliq xatirilep kelmekte.

Biz aldi bilen washin'gton shehirining kapital riflékting köli (Capitol Reflecting Pool) boyida ötküzülgen “5-Iyul ürümchi qirghinchiliqi”ni xatirilesh namayishini neq meydandin ziyaret qilduq. Amérika Uyghur birleshmisining re'isi elfidar iltebir xanim radiyomiz ziyaritini qobul qilip, resim körgezmisi shekli arqiliq élip bérilghan bu qétimliq namayishning bügün etigen sa'et 10:00 din chüshtin kéyin sa'et 6:00 giche dawamlishidighanliqini tilgha aldi. U yene bu qétimliq namayishning ehmiyiti we tesiri toghruluq öz pikirini bayan qilip ötti.

Amérika paytexti washin'gtonda ötküzülgen bügünki namayishqa washin'gton shehiri, wirjiniye we mariland shitatlirida olturushluq Uyghur jama'itidin bir qisim kishiler xizmet orunliridin ruxset sorap kélip qatnashqan. Lagér shahitliridin tursun'ay ziyawudun bügünki namayishqa alahide waqit ajritip qatnashqan. U amérikagha kelgendin buyan bu türdiki namayishlargha izchil halda qatnishish arqiliq, xitayning irqiy qirghinchiliqigha uchrawatqan Uyghur xelqining awazini anglitishqa tirishqan, shundaqla her qétimliq namayishqa qatnishishni özining wijdaniy burchi dep qarap kelgen.

Bügün yene aqsaray we washin'gtondiki xitay elchixanisi aldidimu birla waqitta  namayish élip bérilghan. Amérika Uyghur birleshmisining re'isi elfidar iltebir xanim, dunyaning siyasiy merkiziy bolghan washin'gtonda bir kün ichide oxshimighan nuqtilarda xitaygha qarshi naraziliq namayishlirining élip bérilishi, buningdin 14 yil burunqi “5-Iyul ürümchi qirghinchiliqi” ni xatirilesh, mustebit xitay kommunist hakimiyitige qarshi küch körsitish, shundaqla Uyghur irqiy qirghinchiliqini amérika xelqige anglitishta muhim ehmiyetke ige, dep körsetti.

Tepsilatni yuqiriqi awaz ulinishidin anglighaysiz.