Wuxen'ge ewetilgen doxturlarning "Milliyche ussuli" heqqidiki sin körünüshi munazire qozghidi

Muxbirimiz méhriban
2020-02-13
Élxet
Pikir
Share
Print
Wuxen fangju doxturxanisida ussul oynighan doxtur, 2-türkümde wuxen'ge ewetilgen dawalash etritining mu'awin bashliqi bahargül bimarlargha usul ögetmekte.
Wuxen fangju doxturxanisida ussul oynighan doxtur, 2-türkümde wuxen'ge ewetilgen dawalash etritining mu'awin bashliqi bahargül bimarlargha usul ögetmekte.
Social Media

"Shinjang dawalash ömikidiki doxturlar wuxen fangju doxturxanisida bimarlargha milliyche ussul oynap berdi, uning ismi bahar" serlewhelik qisqa sin körünüshi 12- we 13-féwral künliri xitayche tik-tok munbiri arqiliq, twitter, féysbuk qatarliq ijtima'iy taratqularda keng tarqilip, küchlük munazire qozghidi.

13-Féwral küni xitayning "Sumurgh" téléwiziyesimu mezkur sin körünüshi heqqide xewer berdi. Xewerde Uyghur aptonom rayonining xitayche wéchat toridiki xewiri neqil élinip, wuxen fangju doxturxanisida ussul oynighan doxturlarning 2-türkümde wuxen'ge ewetilgen dawalash etritining mu'awin bashliqi bahargül isimlik doxtur ikenliki tilgha élin'ghan. Mezkur xewerde yene "Bahargül qatarliq birnechche doxturning bimarlarning 'milliy ussul öginish' telipige asasen oynap bergen Uyghurche, qazaqche ussullirining bimarlarning késel wehimisini yéngishige ümid we ishench béghishlighanliqi" alahide eskertilgen.

Twittér, féysbuk qatarliq ijtima'iy taratqularda yézilghan inkaslarning beziliride mezkur sin körünüshi we bu heqte bérilgen xitay hökümet xewerliri tenqidlinip, bu xil xewerlerning xitay kommunist hökümitining "Shinjang naxsha-ussul makani" dégen teshwiqatining yene bir wariyanti ikenliki tilgha élin'ghan. Bu inkaslarda "Wuxen'ge yardem üchün Uyghur diyaridin ewetilgen doxturlar bimarlarning telipige asasen ussul oynap berdi" dégen xewerning özi xitayning Uyghur, qazaq qatarliq milletlerge qaratqan kemsitish xaraktéridiki teshwiqati ikenliki tekitlen'gen.

Amérikidiki xitay weziyet analizchisi ilshat hesen ependi bu heqte öz qarashlirini otturigha qoyup ötti. U wuxen'ge yardem bérish üchün Uyghur diyaridin ewetilgen doxturlarning doxturxanida ussul oynighan körünüshige qarita maxtash we tenqidleshtin ibaret ikki xil perqliq inkaslarning chiqiwatqanliqini buninggha qarita oxshimighan nuqtilardin tehlil qilish kéreklikini bildürdi.

Ilshat hesen ependi awwal mezkur sin körünüshi we bu heqtiki naraziliq inkasliri heqqide toxtilip ötti. U xitay kommunist hökümitining 70 yildin buyanqi basturush siyasitide bu tupraqta yashawatqan Uyghur xelqini "Naxsha-ussulgha mahir xelq" dep teshwiq qilip kelgenliki, yerlik xelqlerni naxsha-ussul arqiliq xitay hökümitini medhiyeleshke mejburlap kelgenliki, del bularning Uyghurlarni narazi qilghan asasiy seweblerning biri ikenlikini bildürdi.

Ilshat hesen ependi yene mezkur sin körünüshidiki Uyghur doxturlarning mushundaq qiyin shara'ittimu ussul oynighanliqi yene bir jehettin éytqanda, diniy étiqadiy bolghan bir xelqning hayatqa bolghan ishench we ümidwarliq rohini ipade qilidighanliqini tekitlep ötti.

Nyu-yorktiki kolombiye uniwérsitétining méditsina ilmi tetqiqatchisi doktor muhemmet imin ependimu bir doxtur bolush süpiti bilen öz qarishini otturigha qoydi.

U aldi bilen ussul oynighan Uyghur we qazaq doxturlarning wuxendek ötkür yuqumlinish xewpi éghir bolghan rayon'gha yardem namida mejburiy ewetilgenlikini nezerge élish kéreklikini bildürdi. U bu doxturlarning wuxendiki doxturxanida ussul oynishini psixik jehettin qarighanda özidiki ishench we normal keypiyatni saqlash üchün élin'ghan bir tedbir dep chüshinish kéreklikini bildürdi.

Memet iminning qarishiche, hazirgha qeder muqim bir dawalash tedbiri bolmighan ötkür yuqumgha qarita kishilerning ümidwar keypiyatta bolushi we beden saghlamliqini saqlishi késelge taqabil turushning ünümlük usulliridin biri hésablinidiken.

Doxtur memet imin ependi yene Uyghur doxturlar ussul oynighan bu körünüshining xitay hökümet xewerliride teshwiq qilinishining xitay hökümitining xitaydiki wirustin yuqumlinish wehimisige qarita élin'ghan bir tedbiri déyishkimu bolidighanliqini bildürdi.

U korona wirusi seweblik kélip chiqqan wehime tüpeylidin xitayda éghir ijtima'iy muqimsizliq we iqtisadiy ziyan körülgenlikini, buninggha qarita xitay hökümitining ilgiriki yuqumlinish heqqidiki uchurlarni qamal qilishni dawamlashturush bilen birlikte yene xitayda kishilerni ümidlendüridighan teshwiqat xewerlirinimu bériwatqanliqini tekitlep ötti.

Toluq bet