Mazar yézisida wuxendin kelgen 5 kishi barliqi, ulardin birining yuqum gumandari a'ilisige qoshna ikenliki ashkarilandi

Muxbirimiz shöhret hoshur
2020-03-02
Élxet
Pikir
Share
Print
Xitay doxtur we saqchilarning a'ililerge bérip wirus yuqumini tekshürüwatqan körünüsh. 2020-19-Féwral, altay.
Xitay doxtur we saqchilarning a'ililerge bérip wirus yuqumini tekshürüwatqan körünüsh. 2020-19-Féwral, altay.
AFP

Ghulja nahiyesining mazar yézisida bir a'ile kishilirining korona wirusi gumani bilen doxturxanida yatquzulup karantin'gha élin'ghanliqi heqqidiki xewerlirimiz bérilgendin kéyin anglighuchilirimizdin biri radiyomizgha uchur yollap, "Yuqum gumandari" dep békitilgen a'ilining tam qoshnisi wuxendin tetil qilip kelgen bir oqughuchi ikenlikini ashkarilidi. Uning melum qilishiche, ghulja nahiyeside tarqalghan jem'iyet xewerliride wirusning mezkur a'ilige wuxendin kelgen shu oqughuchidin yuqqanliqi ilgiri sürülgen. Éniqlashlirimiz dawamida gumandar a'ilining yan qoshnisining wuxen uniwérsitéti igilik bashqurush fakultétining2 ‏-yilliq oqughuchisi ikenliki aydinglashti. Emma mezkur oqughuchi bilen gumandar a'ile özlirining bir yildin buyan kirish-chiqish qilishmighan qoshnilar ikenlikini bayan qilip öz'ara wirus yuqqan yaki yuqturghanliq éhtimalliqini inkar qildi

Anglighuchilirimizdin birining inkas qilishiche, ghulja nahiyesining mazar, döngmazar we qash yézilirida köp sanda ahalilerning öylirining péchetlinishi hemde bir türküm ahalilerning doxturxana we karantinigha yötkilishi dawamida ghulja nahiyesidiki jem'iyet xewerliride mazar yézisida 78 yashliq bir bowaygha wuxendin qaytip kelgen bir oqughuchi teripidin wirus yuqqanliqi heqqide gep tarqalghan. Bu gep-sözler torlardimu tarqilishqa bashlighandin kéyin alaqidar organlar bu uchurlarning selbiy tesiri, yeni muqimliqqa tesir körsitip qélishining aldini élish üchün mezkur uchurlarni tordin yuyuwetken.

Bu heqte élip barghan téléfon ziyaretlirimiz dawamida yuqum gumandarliri bayqalghan mazar yézisining shéx mehelliside wuxendin qaytip kelgen bir oqughuchining barliqi we uning ghulja shehiride karantin astida dawaliniwatqan pexirdin xélil aka bilen qoshna ikenliki aydinglashti. Pexirdin aka bu qoshnisi bilen ariliridiki melum bir arazichiliq sewebidin bir yildin buyan kirish-chiqish qilmaywatqanliqi, u mekteptin qaytip kelgendin buyan uchriship baqmighanliqini melum qildi.

Özining wuxen uniwérsitétining igilik bashqurush fakultétida oquydighanliqini bayan qilghan mezkur oqughuchimu özide hazirgha qeder héchqandaq késel alamiti bayqalmighanliqini we saghlamliqini tilgha élip özidin qoshnisigha wirus yuqti déyilgen bu jem'iyet xewerlirining asassiz ikenlikini ilgiri sürdi. U bu yézida wuxendin kelgenlerning yalghuz özi emesliki, jem'iy 5 kishi barliqini bayan qildi.

Xelq'ara axbaratlardiki analizlarda déyilishiche, tajsiman wirusni eng deslepte bayqighan we kishilerni agahlandurghan 8 neper sehiye xadimi eyni chaghda ösek söz tarqitish bilen eyiblinip jazalan'ghanliqi üchün nöwette xitay da'irilirining tajsiman wirus heqqidiki herqandaq bir uchuri jem'iyette guman bilen qaralmaqta. Ghulja nahiyesining mazar yézisida korona wirusi yuqumi gumandari bayqalghanliqi we bu seweblik ghulja nahiyeside köp sanda öylerge péchet sélin'ghanliqi hemde ahalilerning karantin astigha élin'ghanliqi jem'iyette keng ashkarilan'ghan bolsimu, emma hökümet axbaratlirida bu nahiyede peyda bolghan bu patiparaqchiliqning sewebi, yuqum gumanining toghra bolup chiqqan yaki chiqmighanliqi, toghra bolghan bolsa bu yuqumning kimdin we qandaq yuqqanliqi heqqide héch qandaq uchur bérilmidi.

Toluq bet