Pétir nawaro: tajsiman yuqumluq nepes yoli wirusigha qarshi dora yasilish aldida

Muxbirimiz jüme
2020-02-17
Élxet
Pikir
Share
Print
Aqsarayning soda meslihetchisi pétir nawaro.
Aqsarayning soda meslihetchisi pétir nawaro.
Social Media

Aqsarayning soda meslihetchisi pétir nawaro xitayda keng tarqilip dunyawi tehdit yaratqan tajsiman yuqumluq nepes yoli wirusigha qarshi dorining uzun'gha qalmay yasilishqa bashlaydighanliqini éytti.

U, bu sözlerni jüme küni kechqurun fokus soda qaniligha bergen söhbitide otturigha qoydi. 

Uning éytishiche, aqsaray nöwette bu wirusqa qarshi dorini ishleshni jiddiy rewishte teshebbus qiliwatqan bolup, dorini sinaq qilish we yasash ishliri féwralning axiri yaki martning otturilirida bashlinidiken.

Tajsiman wirus dunya boyiche 69 mingdin artuq ademge yuqqan, xitayda eng az dégende 1600 ademning jénigha zamin bolghan mezgilde bundaq bir dorining sinaq qiliniwatqanliqi heqqidiki xewerler bir ümidtin dérek béridiken.

Xewerde körsitishiche yene, amérikadiki 5 chong shirket kéler yili noyabirghiche 150 milyon kishilik waksina teyyarlash üchün jiddiy ishqa kirishken. Emma u, bu emgekning zor tirishchanliq we tetqiqat telep qilidighanliqinimu qoshumche qilghan.

U, amérikidiki "Giléd" shirkiti tajsiman wirusqa qarshi yasap chiqqan "Rémdésiwir" namliq bir dorida ümid zor bolup, nöwette buni derhal klinikiliq sinaqtin ötküzüsh zörürlükini éytqan.

Halbuki, mezkur wirus shiddet bilen tarqilip éghir tehdit shekillendürüwatqan bolsimu, xitay hökümiti amérika bilen hemkarliship bu dorini klinikiliq sinaq qilish ishlirigha hemdemde bolmighan. 

U bu heqte toxtilip mundaq dégen: "Biz buni hel qilish üchün bashqiche yol tutushimizgha toghra kélidu. Eger biz uni qilalisaq, biz kishilerni dawaliyalaydighan bu dorini ishlepchiqirish qedimini tézliteleymiz."

Amérika da'iriliri ötken hepte xitaygha 18 tonna sehiye maddiy eshyasi ewetkendin bashqa 100 milyon dollar iqtisadiy yardem bergen. 

Emma shundaqtimu xitay da'iriliri amérika yuqumluq késellikning aldini élish merkizi tetqiqatchilirining xitaygha bérip tekshürüsh élip bérishigha ruxset bermigen. Hetta bezi xewerlerde xitayning "Amérika yardem bermidi" dep yalghan éytip, amérikini öz xelqige yaman körsitiwatqanliqi ilgiri sürülgen.

Toluq bet