Roshen abbas xanim xelq'ara kechürüm teshkilatining amérika shöbiside doklat berdi

Ixtiyariy muxbirimiz jewlan
2020-05-19
Élxet
Pikir
Share
Print
Xudson aqillar merkizide ötküzülgen muhakime yighinida mutexessislerdin luyiza grérw we roshen abbas söz qilmaqta. 2018-Yili 5-séntebir, washin'gton shehri
Xudson aqillar merkizide ötküzülgen muhakime yighinida mutexessislerdin luyiza grérw we roshen abbas söz qilmaqta. 2018-Yili 5-séntebir, washin'gton shehri
RFA

Yéqinqi xewerlerdin melum bolushiche, Uyghur kishilik hoquq qanun layihesining amérika kéngesh palatisidin ötüshi bilen teng Uyghurlar mesilisige munasiwetlik yighin we yighilishlar köpeymekte. Korona wirusi hemmining diqqet merkizige aylan'ghan bügünki künde amérika tashqi ishlar ministirliqi we bezi xelq'araliq teshkilatlar Uyghurlar mesilisige yéqindin köngül bölmekte. Amérikadiki "Uyghur herikiti" teshkilati bu pa'aliyetlerde aktip rol oynimaqta.

17-May küni xelq'ara kechürüm teshkilatining teshkillishi bilen amérikaning minyapolis shehiride Uyghur mesilisini anglitish pa'aliyiti uyushturulghan bolup, bu pa'aliyette "Uyghur herikiti" teshkilatining bashliqi roshen abbas xanim "Qul ishchi qilin'ghan hedemning emgek mehsulatini sétiwalghuchilar kimler?" dégen témida tepsiliy doklat bergen.

Roshen abbas xanim ziyaritimizni qobul qilip, bu pa'aliyet heqqide qisqiche melumat berdi. Uning éytishiche, Uyghurlarning hazirqi ehwalini tonushturush, ular uchrawatqan irqiy qirghinchiliq we xitayning heqiqiy epti-beshirisini échish pa'aliyiti "Uyghur herikiti" teshkilatining yéqindin béri élip bériwatqan pa'aliyetlirining bir qismi iken.

17-May künidiki doklatning nishani amérika xelqige Uyghurlarning béshigha kelgen paji'e we ularning erkinlik üchün qiliwatqan kürishi toghrisida tepsiliy melumat bérip, ularni oyghitish we ularning özliri yashawatqan shtattiki parlamént ezalirigha xet yézishini qolgha keltürüp, Uyghurlarning heq-hoquqini qoghdishigha türtke bolush iken. Wirus tüpeylidin zo'om arqiliq ötküzülgen bu doklat bérish pa'aliyitige 30 nechche kishi qatnashqan bolup, bashqilar sirttin awaz arqiliq anglighan.

Igilishimizche, doklattin kéyin anglarmenlerdin Uyghurlarning bu éghir ehwali toghriliq bügünkidek tepsiliy melumat anglimighanliqi heqqide inkaslar kelgen bolup, beziliri Uyghurlar üchün néme ish qilip béreleymiz dégendek semimiy niyet we iradilirini namayan qilghan.

Roshen abbas xanim bu doklatida lagérlarning heqiqiy ehwalini tepsiliy chüshendürüsh bilen birge yene xitay hökümitining yash emgek küchlirini türküm-türkümlep xitay ölkilirige yötkep qul ishchi ornida éziwatqanliqini tekitlesh yüzisidin bu doklatni teyyarlighanliqini, yéqin kelgüside xitayning bu zulumni hessilep kücheytishi mumkinlikini, shunga xelq'araning mesilige diqqet nezerini aghdurushini ümid qilidighanliqini bildürgen.

Roshen abbas xanim yene Uyghurlarning béshidiki bu zulumni xelq'ara teshkilatlargha anglitishta Uyghurlar duch kéliwatqan mesilining heq-hoquq mesilisidin öte irqiy qirghinchiliq mesilisi, bir milletning hemme nersisining yoqilip kétish xewpi mesilisi ikenlikini pakit bilen chüshendürüsh we dawamliq tekitleshning nahayiti muhimliqini tilgha aldi.

Roshen abbas xanimning éytishiche, u doklat bériwatqan chaghda xitay xakkérliri bir nechche qétim tor hujumi qozghighan bolup, ékran'gha xitayning dölet bayriqi bilen bille dölet shé'irini chiqirip qoyghan yaki qalaymiqan bir nersilerni yézip haqaret qilghan. Roshen xanimning tekitlishiche, xitay xakkérlirining bu rezil we peskesh qilmishi emeliyette özlirining nomussizliqigha roshen pakit bolup qalghan.

Roshen abbas xanim yéqindin béri özining mushundaq pa'aliyetler bilen bek aldirash ötüwatqanliqini, "Uyghur herikiti" teshkilatining buningdin kéyin qilidighan ishlirining téximu köp ikenlikini, xitay da'irilirining her xil wasitiler bilen tosqunluq qilishigha qarimay dawamliq küresh qilidighanliqini bildürdi.

Igilinishiche, xelq'ara kechürüm teshkilati dunyadiki 150 tin artuq dölet we rayonda kishilik hoquq depsendichilikige uchrawatqan kishilerning hoquqini qoghdaydighan xelq'araliq teshkilat bolup, yillardin buyan Uyghurlarning kishilik hoquq mesilisige izchil köngül bölüp kelgen, shundaqla Uyghur teshkilatliri bilen hemkarliship emeliy pa'aliyetlerni élip barghan iken. Bu qétim mezkur teshkilat uyushturghan pa'aliyetke qatnashqan "Uyghur herikiti" teshkilati Uyghur mesilisini xelq'aragha tonutushta aktip pa'aliyet qiliwatqan bolup, roshen abbas xanim 13-may amérikaning éstoniyediki elchixanisi uyushturghan Uyghurlar toghriliq doklat bérish yighinidimu doklat bergen idi.

Toluq bet