Абабәкри қасим: гуәнтанамо түрмисидин қоюп берилгән 7 йил җәрянида

Ихтиярий мухбиримиз қутлан
2013-08-13
Share
ababekri-qasim-albaniye-305.png Гуәнтанамо түрмисигә қамилип албанийәгә қоюп берилгән абабәкри қасим
RFA/Qutlan

Гуәнтанамо түрмисигә қамалған 22 нәпәр уйғурдин тунҗи түркүмдә қоюп берилгән абабәкри қасим қатарлиқ 5 нәпәр уйғурниң албанийәдә йәрләшкинигә бу йил 7 йил болди.

Бу 7 йил җәрянида уларниң бири шиветсийәниң панаһлиқиға еришип һазир стокһолмда туғқанлири билән биллә яшимақта. Қалған төтәйлән албанийә пайтәхти тирана шәһиригә тәдриҗи йәрлишип өзлириниң бу әлдики йеңи һаятини давамлаштурмақта. Улардин абабәкри қасим зияритимизни қобул қилип, өзиниң өткән он нәччә йиллиқ һаятини әсләп өтти. У 1997 - йили ғулҗида йүз бәргән "5 - феврал вәқәси" ниң өз һаятидики бурулуш нуқтиси болғанлиқини илгири сүрди.

Гуәнтанамо түрмисидин қоюп берилгәндин кийин албанийәдә яшаватқан абабәкри қасим қатарлиқ 4 нәпәр уйғур
Гуәнтанамо түрмисидин қоюп берилгәндин кийин албанийәдә яшаватқан абабәкри қасим қатарлиқ 4 нәпәр уйғур

Абабәкри қасим 1997 - йилидики "5 - феврал вәқәси" дин кейин хитай түрмисидә ятқан күнлиридә болсун яки 2001 - йилидин кейин гуәнтанамо түрмисигә наһәқ қамалған йилларда болсун, қәлбигә вәтәнниң һөрийитини чигип яшап кәлгәнликини тәкитлиди. У 2006 - йили һөрлүккә еришип албанийәгә кәлгәндин буян хәлқара мәтбуатқа уйғурлар һәққидә учур бериш йоли арқилиқ өзиниң виҗданий мәсулийитини ада қилип кәлгәнликини билдүрди.

У нөвәттә уйғурлар вәтинидә йүз бериватқан қанлиқ вәқәләр һәмдә миллий мәвҗутлуқ үчүн уйғур хәлқи төләватқан еғир бәдәлләр һәққидә тохтилип: "уйғур хәлқи чекиватқан азаблар алдида бизниң тартқан җапайимиз һечгәп әмәс" деди.

Абабәкри қасим зияритимиз җәрянида өзи башлиқ гуәнтанамо түрмисигә қамалған 22 нәпәр уйғур чәккән еғир риязәтләрниң әмәлийәттә уйғур миллитиниң нөвәттики иҗтимаий реаллиқиниң бир қисми икәнликини билдүрди. У, гуәнтанамо түрмисидә өткән бирқанчә йиллиқ тутқунлуқ кәчүрмишлириниң гәрчә өзиниң шәхсий һаятидики аччиқ қисмәт һесаблансиму, лекин буниң уйғур мәсилисини хәлқараға тонутуштики бир вастә болғанлиқиға ишинидиғанлиқини тәкитлиди. У әгәр өз кәчүрмишлириниң уйғур дәваси үчүн мәлум пайдиси болидиғанла болса, һәрқандақ шараитта һәрқандақ хәлқаралиқ мәтбуатниң зияритини қобул қилишқа тәйяр икәнликини билдүрди шундақла шараит яр бәргәндә өз һаятидин әслимә йезиш ойи барлиқини илгири сүрди.

Тәпсилатини аваз улиништин аңлиғайсиз.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт