Алматада азадлиқ, әркинлик, кишилик һоқуқи үчүн шеһит болғанлар әсләнди

6 - Майда алмата шәһириниң султанқорған мәһәллиси кафийханилириниң биригә җәм болған уйғур җамаәтчилики қуран оқуп, азадлиқ, әркинлик, кишилик һоқуқи үчүн шеһит болған қериндашлирини әслиди.

Мәлумки, йеқинда франсийә пайтәхти парижда өткән 6 - новәтлик уйғур ханим - қизлирини демократийә вә инсан һоқуқи билимлири бойичә тәрбийиләш курсиға қатнашқан аялларниң омумий йиғинида “дуня уйғур аяллар бирлики” тәсис қилинип, униңда тәшкилат рәиси вә униң җай - җайлардики муавинлири сайланған иди.

Хатирә паалийитидә доклат билән сөзгә чиққан дуня уйғур аяллар бирлики рәисиниң оттура асия бойичә муавин рәиси асийәм турдийева мәзкур курсниң роһини йиғин қатнашқучилириға йәткүзди. Буниңдин ташқири сөзгә чиққучилар бу қетимқи курсниң мәқсәт, вәзипилири вә әһмийити, уйғур ханим - қизлириниң миллий маарипни, мәдәнийәтни раваҗландуруштики, яш әвлатларни тәрбийиләштики ролини, омумән уйғур миллий һәрикитидә тутқан орнини, шундақла бирлик, иттипақлиқниң муһимлиқини алаһидә тәкитлиди.

Шуниңдәк, йиғинда сөз алған дуня уйғур қурултийиниң қазақистандики алаһидә вәкили, сиясәтшунас қәһриман ғоҗамбәрди болупму маралбеши наһийиси сериқбуя кәнтидә сақчилар вә йәрлик аһалиләр оттурисида йүз бәргән тоқунушниң келип - чиқиш сәвәблирини вә ақивәтлирини тәпсилий чүшәндүрди.

У, сақчилар тәрипидин көрситилгән һақарәткә чидимиған уйғурларниң, наразилиқ билдүргинидә қанунсиз оққа тутулғанлиқини, шуниң билән кәнт аһалисиниң уштумтут қозғилишида хитай һөкүмитиниң қутратқулуқ рол ойниғанлиқини көрсәткән. У шундақла вәқә сәвәблирини чүшәндүрүп: “бу, хитайниң уйғуристандики мустәмликә сияситиниң ақивити. Йәни, бейҗиңниң уйғуристанда илгири сүрүватқан “қош тиллиқ маарип”, көчмән йөткәш, пиланлиқ туғут, диний чәкләш, мәҗбурий ассимилиятсийә қилиш, инсан һоқуқини дәпсәндә қилиш сияситиниң нәтиҗиси. Мәзкур сиясәт өзгәрмигичә уйғурларниң қаршилиқи вә өз тәқдирини өзи әркин бәлгиләш қануний һәрикити күчийивериду” деди.

Радиомиз зияритини қобул қилған алмата шәһири турғуни шәһәрбанум сәйдуллаева мәзкур мурасим һәққидә қаришини оттуриға қойди.