Erdoghan qiyin künlerni bashtin kechürmekte

Ixtiyariy muxbirimiz ömerjan
2014.02.05
milliy-irade-munbiri-yighini-erdoghan-sozde.jpg Milliy irade munbiri yighinida türkiye bash ministir rejep tayyip erdoghan söz qildi. 2014-Yili 25-yanwar, istanbul.
RFA/Arslan

Türkiyede hakimiyet üstide turuwatqan adalet we tereqqiyat partiyisining re'isi rejeb tayyib erdoghanning türkiyening tereqqiyatigha we iqtisadining yüksilishige qoshqan töhpiliri türkiye ichide alqishlan'ghan.

Uning islam dunyasigha köngül bölüshi we pelestinliklerge oxshash ézilgen musulman milletlerning heq-hoquqlirini telep qilish yolidiki jür'iti we tirishchanliqi ereb we islam elliride maxtiliwatqan mushu peytlerde, erdoghan hökümitige qarshi küchlerning xirisliri kündin-kün'ge ashmaqta.

Melumki, adalet we tereqqiyat partiyisining töhpiliri xelqni qayil qilghan, hetta türkiyediki eng nopuzluq jama'et-fetqullah gülenning jama'itimu bu partiyini deslep qollighan we uninggha awaz bergen idi. Epsuski, weziyet hazir bashqiche bolmaqta. Yeni türkiyede adalet we tereqqiyat partiyisige awaz bergen bu jama'et emdilikte bu partiyini hakimiyettin chüshürüshning barliq chare-tedbirlirini qollanmaqta.

Bezi tehlilchilerning éytishiche, bash ministir erdoghan her qaysi jama'et mu'esseselerning oqughuchilarni qonduridighan mexsus yataqxanilirini we shexsiy dersxanilarni taqiwétish qararini chiqarghandin kéyin, fetqullah gülen jama'itining bash ministirgha qarshi isyani bashlinip ketken. Chünki bu jama'etning mexsus yataqxaniliri we dersxaniliri birdinbir adem terbiyilesh merkezliri bolup, ularning jan tomuri hésablinidiken. Yene bezi tehlilchiler fetqullah gülen jama'itining bash ministir erdoghan'gha qarshi ighwagerlikini gherb döletlirining küshkürtüshi bilen türkiyege ziyan yetküzüsh üchün qiliwatqan heriket dep chüshendüridu. Némila bolmisun, türkiyediki adalet we tereqqiyat partiyisi bilen fetqullah gülen jama'iti otturisidiki sürkilish ewjige chiqmaqta. Jama'etning qolidiki ilgiri xewerlirining yüzde yetmish pirsenti erdoghanning we uning partiyisining ijabiy pa'aliyetlirini tonushturidighan “Saman yoli” téléwiziyisi hazirda programmilirining mutleq köp sanliqini erdoghanni we uning partiyisini eyiblesh bilen toldurmaqta.

Londonda chiqidighan “Ottura sherq” gézitining 2014-yili5-féwral künidiki sanida, yazghuchi semir salihening qelimi bilen “Erdoghan qiyin künlerni bashtin kechürmekte” dégen témida bir maqale élan qilin'ghan bolup maqalide mundaq dep yézilghan: “Türkiyediki adalet we tereqqiyat partiyisi bilen fetqullah gülen jama'iti otturisidiki sürkilish toqunushqa ötmekte. Yene bir menidin éytqanda erdoghan bilen fetqullah gülen bir-birige qarshi meydan'gha chüshken bolup, fetqullah gülen özining jama'itidin we téléwiziye qanilidin küch alsa, erdoghan küchini hökümitidin we awam xelqtin almaqta. Fetqullah gülen jama'iti ezeldin özlirini siyasetke arilashmaydighan jama'et dep tonushturup kelgen we qaysi partiye utup chiqidighandek bolsa, shu partiye bilen kélishim tüzüp, uninggha awazini bérip kelgen bir jama'et idi. Emdilikte ular özlirining hökümet ishlirigha arilishish peyti kelgenlikige qana'etlen'gen halda, erdoghan hökümiti ichide musteqil hökümet bolush xiyaligha kelgen. Bu bash ministir erdoghanning tebiridur, xalas. Erdoghanning fetqullah gülen jama'itining mensuplirini saqchi organliridin tazilash herikiti nahayiti tiz dawam qilmaqta. Qarshi terepte fetqullah gülenning erdoghan'gha qarshi teshwiqatliri turmastin tarqitilmaqta. Fetqullah gülen jama'iti bu jengde özi yalghuz emes, ular türkiyediki adalet we tereqqiyat partiyisige qarshi partiye we jama'etler bilen birleshken. Bu sewebtin axirqi waqitlarda adalet we tereqqiyat partiyisining terepdarliri töwenlep ketken. Hetta ilgiri fetqullah gülenning buyruqi bilen adalet we tereqqiyat partiyisige eza bolghan kishilerdin köpliri yene fetqullah gülenning buyruqi bilen partiyidin istépa sorap chiqip ketken. Démek, ular erdoghanni ottura yolda terk etmekchi bolghan. Bu jama'etning erdoghan'gha qarshi heriketliri hemme sahelerde élip bérilmaqta. Hetta erdoghanning süriyediki ézilgen xelqqe ewetken insaniy yardemlirini térrorchilargha eslihe yardem qildi, dep élan qilghan.”

Erdoghan hérip qalmaydu

Maqalide yene mundaq dep yézilghan:“Türkiyediki fetqullahchilar we qarshi partiyeler teripidin erdoghan'gha qarshi élip bérilghan bu qattiq hujumlar erdoghanning iradisini boshatqandek emes. Chünki u ilgirikidin bekrek tirishchanliq bilen wetini türkiye üchün ishlimekte. Bir tereptin fetqullah gülen jama'itining erdoghan hökümitini aghdurup tashlash üchün xéli köp waqittin biri teyyarlighan pilanliri sözlen'gen plastinkilarni qolgha chüshürüp ularning pilanlirini ujuqturmaqta we ularning ichki dunyasini türkiye xelqige pash qilip turmaqta. Hazirghiche, mezkur jama'etning we bezi qarshi partiyelerning köpligen yolsiz pilanliri pash qilin'ghan bolup, awam xelqning erdoghan'gha bolghan ishenchi ashqan. Aldimizdiki mart éyida ötküzülidighan sheherlik hökümet ezalirini tallap chiqish saylimida adalet we tereqqiyat partiyisining téximu köp awazgha érishishi kütülidiken. Emma türkiyediki fetqullah gülen jama'itining heriketliri we sözliri özlirining lidéri fetqullah gülenni iranning türkiyediki xumeynisi qilish ikenlikini körsitip turidu. Buni awam xelqmu chüshinip yetmekte. Türkiye xelqi türkiyening iran'gha oxshash bolushini hergizmu xalimaydu. Bu jama'etning özlirining menpe'iti üchün türkiyeni we türkiyening kélechikini qurban qilmaqchi bolghanliqi xelqning ghezipini ashurmaqta iken. Ishning qiziq yéri, türkiyediki kurdistan ishchilar partiyisining ikkinchi katta adimi ilgiri erdoghan hökümitining türkiye armiyisige uni we uning bilen taghda bolghanlarni yoqitish qararini bergenlikini bilip turup, bu qétim erdoghanning fetqullah gülen jama'itige qarshi jéngide uning yénida turghanliqi we uni qollap-quwwetligenliki idi. Bu némidin dérek béridu? tebi'iyki, erdoghanning bu jengde ghelibe qilidighanliqidin dérek béridu.”

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.