Myunxéndiki hujumda on nechche kishi d u q ishxanisida panahlandi

Muxbirimiz méhriban
2016.07.23
germaniye-hujum-olympia-soda-merkizi-2016.jpg Weqe yüz bergen gérmaniyening myunxén shehiridiki olimpik soda merkizi
Public Domain

Xelq'ara taratqularning xewiridin melum bolushiche, 22 - iyul kechqurun gérmaniyening myunxén shehiridiki olimpik soda merkizi qatarliq birqanche jayda qoralliq hujum weqesi yüz bergen. Saqchilar weqede nechche on ademning ölgenlikini we soda rayonining qamal qilin'ghanliqini élan qilip, kishilerni weqe bésiqquche sirtqa chiqmasliqqa, panahlinishqa agahlandurghan. Dunya Uyghur qurultiyi bash katipi dolqun eysaning bildürüshiche, soda merkizige yéqin jaydiki dunya Uyghur qurultiyi ishxanisighimu 20 - 30 gha yéqin yash kirip panahlan'ghan.

Yuqiriqi uchurlar otturigha chiqqandin kéyin, dunya Uyghur qurultiyi bash katipi dolqun eysagha téléfon qilip ehwal igiliduq.

Dunya Uyghur qurultiyi bash katipi dolqun eysa ependi 22 - iyul chüshtin kéyin sa'et 7 din ashqanda özining ishxana sirtida oq étilghan awazlarni anglighanliqini, arqidin ishxanining töwen qewitidiki ishikning échilip 20 - din 30 qeder bolghan yashlarning ishxanigha panahlinish üchün kirip kelgenlikini we özi bilen sözleshken yashlarning soda merkizide nechche on ademning étip öltürülgenlikini éytqanliqini bildürdi.

Dunya Uyghur qurultiyining myunxéndiki ishxanisigha panahlan'ghan bir gérman yash soda merkizide oq atqan ademni öz közi bilen körmigenliki, oq awazinimu anglimighanliqi emma bashqilarning terep - terepke qéchishqa bashlighanliqini körgendin kéyin öziningmu qéchip bu ishxanigha kiriwalghanliqini bildürdi. U yene bu weqening néme sewebtin yüz bergenlikidin xewer yoqlighini éytti.

Gérmaniyening myunxén shehiridiki radiyomiz ixtiyari muxbiri ekrem ependi gérmaniye téléwizorlirida weqe heqqide bériliwatqan xewerlerdin neqil élip, weqening 22 - iyul shu yer waqti kech sa'et 7 etrapida yüz bergenlikini, saqchilarning weqe sadir qilghuchilarning qoralliq 3 kishi ikenlikini bildürüp, kishilerni saqchilar qatillarni tutqiche kochigha chiqmasliqqa agahlandurghanliqi qatarliq ehwallarni bildürdi.

Radiyomiz ziyaritini qobul qilghan dolqun eysa ependi yene özlirining ehwali heqqide téléfon arqiliq saqchilargha xewer bergendin kéyin, saqchilarning ulargha weqe bésiqquche ishxanidin chiqmasliq, ishxana chiraghlirini öchürüp özlirini mudapi'e qilishqa agahlandurghanliqini bildürdi.

Dolqun eysa ependi mundaq dédi: “Hazirche biz üchün bir chong chataq yoq. Saqchilar bilen sözleshtuq, ular bizning ishxana bar kochini kontrol astigha aptu, bizge chiraghlarni öchürüp, ishxanida jim olturushni tewsiye qildi. Insha'allah bir chataq bolmas.”

Dolqun eysa ependi bayanida yene, dunya Uyghur qurultiyi ishxanisigha yéqin jaydiki teklimakan Uyghur réstoranighimu bir qisim kishiler panahlinish üchün kirgenlikini anglighanliqini bildürüp, ishxanining sirt bilen bolghan alaqisi üzülgenliki we téléwizorni échish imkaniyiti bolmighachqa weqening néme sewebtin yüz bergenliki we kim teripidin élip bériliwatqanliqini shundaqla myunxéndiki bashqa Uyghurlarning ehwalini bilmeydighanliqini éytti.

Ekrem ependi qoralliq hujum weqesi yüz bergen jaylar heqqide toxtilip, weqening myunxén shehiridiki olimpiya soda merkizi we kalzplatz stahus yeni meryem soda meydanida yüz bergenlikini, myunxéndiki dunya Uyghur qurultiyi ishxanisi bilen teklimakan Uyghur réstoranining weqe yüz bergen sheher merkizidiki karlzplatz stahus dégen yerge 100 métir, meryem soda meydanigha 200 métir ariliqta ikenliki, mushu sewebtin, qoralliq kishilerning hujumidin qachqanlarning qurultay ishxanisi we teklimakan Uyghur réstoranigha kirip panahlan'ghanliqini bildürdi.

Ekrem ependi myunxén sheher weziyiti heqqide özi igiligen ehwallar heqqide toxtilip, hazirche myunxéndiki Uyghurlarning arisida weqede yarilan'ghanlarning yoqluqini bildürdi.

Nöwettiki eng yéngi melumatlargha qarighanda, nöwette weqede ölgen adem sani 9 neperge yetken. Yerlik saqchi da'iriliri weqe gumandarlirini téxi izdewatqanliqini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.